विराटनगरसँग सिमाना जोडिएको नेपाल-भारत सीमा क्षेत्रको दशगजामा बिहीबार दिउँसोदेखि डोजर चलाउन थालिएको छ। अतिक्रमण गरेर अवैध हिसाबले दशगजा कब्जा गरी बनाइएका घरटहरा हटाउने अभियानअन्तर्गत नेपाल र भारतका सुरक्षा निकायबीचको समन्वयमा डोजर चलाइएको हो।
यसअघि नै सूचना जारी गरेर अतिक्रमित दशगजा क्षेत्र खाली गर्न आग्रह गरेपनि नमानेपछि भारतको सीमा सुरक्षा बल (एसएसबी)ले नेपाल र सशस्त्र प्रहरी बलसँगको समन्वयमा दशगजा क्षेत्रमा पहिलोपटक डोजर प्रयोग गरेको हो।
डोजर चल्न थालेपछि अतिक्रमण गरी संरचना बनाएर दशगजा कब्जा गरी बसेकाहरुबीच भागाभाग मच्चिएको थियो।
ठूलो संख्याका भारतीय र केही नेपालीले घरटहरा बनाएर लामो समयदेखि दशगजा कब्जा गरी बसेका थिए। विशेष गरेर दशगजामा भारतीयको हालीमुहाली चल्थ्यो। अवैध संरचना हटाउने क्रममा भारतको टिकुलिया र विराटनगर महानगरपालिका–१६ दरैयाको सीमा क्षेत्रको दशगजामा बनाइएका ५५ वटा घरटहरा भत्काइएको छ। जसमा ५३ वटा भारतीय र २ वटा नेपाली नागरिकले बनाएका घरहरु परेका छन्।
सशस्त्र प्रहरी बल मोरङका प्रमुख एसपी तीर्थ थापाका अनुसार टिकुलिया–दरैयाबीचको १८० नम्बर पिलरदेखि १८०/१९ सम्म लगभग १ किलोमिटरजति क्षेत्रमा बनाइएका संरचना हटाएर दशगजा क्षेत्र खाली गरिएको छ।
अवैध घरटहरा हटाएपछि जीर्ण अवस्थामा रहेका सीमा स्तम्भको मर्मत सम्भारका लागि पनि पहल गरिने प्रशासनले जनाएको छ। सीमा क्षेत्रको समस्या कूटनीतिक पहलबाटै समाधान गर्नु उत्तम हुने सुरक्षा अधिकारी बताउँछन्।
Copyright © 2019 / 2026 - Junkirikhabar.com All rights reserved
