धरान उपमहानगरपालिकाका मेयर हर्क साम्पाङले समाचार सम्प्रेषण गर्न गएका पत्रकारहरूप्रति अशोभनीय व्यवहार गरेको र अराजकता प्रस्तुत गरेको भन्दै नेपाल पत्रकार महासंघ सुनसरीले जिल्ला प्रशासन कार्यलयमा ज्ञापन पत्र बुझाएको छ ।
शुक्रबार सुनसरीकी प्रमुख जिल्ला अधिकारी हुमकला पाण्डेलाई महासंघको टोलीले ज्ञापनपत्र बुझाएको हो । मेयरका समर्थकहरू पत्रकारबिरुद्व अराजक भएर प्रस्तुत हुँदा पत्रकारहरूलाई रिपोर्टिङ गर्न समस्या भइरहेको महासंघले जनाएको छ ।
श्रृंखलाबद्व रुपमा मेयर साम्पाङद्वारा अभिव्यक्ति स्वतन्त्रता तथा प्रेस स्वतन्त्रताविरोधी गतिविधि बढिरहेको बताउदै धरान उपमहानगरपालिकाको गतिविधिबारे समाचार संकलन गर्न जाने सहज वातावरण पत्रकारका लागि नभएको जनाएको छ ।
अभिव्यक्ति स्वतन्त्रता, प्रेस स्वतन्त्रता र पत्रकारहरूको सुरक्षाको लागि जिल्ला प्रशासन कार्यालय सुनसरीमार्फत नेपाल सरकार गृह मन्त्रालयसमक्ष मागपत्र पेस गरिएको बताइएको छ ।
यसअघि महासंघले चरणबद्व आन्दोलन गर्ने घोषणा गरेको थियो । सोही अन्तर्गत बैशाख २८ गते बिहीबार प्रेस विज्ञप्ति जारी गर्ने, २९ गते जिल्ला प्रशासन कार्यालयमार्फत गृह मन्त्रालयसमक्ष ज्ञापन पत्र बुझाइएको हो ।
यस्तै, ३० गते शनिबार सुनसरीबाट प्रकाशित पत्रिका र अनलाइन पोर्टलहरूमा एउटै नारा प्रकाशन र प्रसारण गर्न आग्रह गर्ने, ३१ गते सुनसरीका पत्रकारहरूले एउटै नारा फेसबुक स्ट्याटसमा लेख्ने, जेठ १ गते धरानमा मौन जुलुस प्रदर्शन गर्ने र २ गते धरानमै पूर्व नगर प्रमुखहरूसँग अन्तरक्रिया गर्ने भएको बताइएको छ ।
Copyright © 2019 / 2026 - Junkirikhabar.com All rights reserved
