इटहरी उपमहानगरले पेट्रोलियम पदार्थले चल्ने गाडीलाई विद्युतीयमा रूपान्तरण गर्ने विस्तृत अनुसन्धान सुरु गरेको छ ।
सरकारले सवारी तथा यातायात व्यवस्था ऐनमा संशोधन गर्दै विद्युतीय गाडीमा रुपान्तरण गर्न सकिने व्यवस्था गरे संगै इटहरी उपमहानगरले देशमै पहिलो पटक सम्याति इलेक्ट्रो व्हील्स प्रालिसँग सम्झौता गरेको हो ।
पहिलो चरणमा दुई वटा मोटरसाइकललाई विद्युतीयमा रूपान्तरण र विस्तृत अनुसन्धान गर्ने सहमति भएको इटहरीका मेयर हेमकर्ण पौडेलले बताए ।
पुरानो मोटरसाइकल उपमहानगरले दिने र उक्त मोटरसाइकललाई विद्युतीय मोटरसाइकल बनाउने सहमति भएको मेयर पौडेलले बताए । संघीय सरकारले मर्मत गरेर पनि उपयोगमा आउन नसक्ने र २० वर्ष अवधि पुगेका सवारीसाधनहरू लागत प्रभावीको आधारमा विद्युतीय सवारी साधनमा रूपान्तरण गर्न सकिने व्यवस्था गरेको थियो ।
‘सोही अनुरुप पहिलो चरणमा अनुसन्धान गर्न हामिले थालेका छौँ,’ मेयर पौडेलले भने । देशमै पहिलो पटक स्थानीय तहले यो किसिमको सहमति गरेर काम सुरु गरेको मेयर पौडेलको दाबी छ । कम्पनीका आदित्य आचार्य, रिसब गड्तौला, अस्तित्व मादेम्बा, निकेश बज्रचार्य लगायतले पेट्रोल गाडीलाई रुपान्तरण गर्ने बताइएको छ ।
पुरानो गाडीको इन्जिनको ठाउँमा विद्युतीय मोटर राख्दा कम्तीमा थप १० वर्ष चलाउन सकिने बताइएको छ ।सरकारले चालू आर्थिक वर्षकै बजेटमा पेट्रोलियम पदार्थका गाडीलाई विद्युतीयमा रूपान्तरण गर्न दिने जनाएको छ ।
Copyright © 2019 / 2026 - Junkirikhabar.com All rights reserved
