नेपाल । गैर आवासीय नेपाली संघ एनआरएन वेस्ट्रन अष्ट्रेलियाको युवा संयोजक पदमा इटहरीका मनिष सिग्देलले उम्मेदवारी दिने भएका छन् । २०२३ २०२५ को एनआरएन डब्लुएको यूथ कोडिनेटरमा हुन लागेको निर्वाचनमा आफ्नो उम्मेदवारी दिँदै सिग्देलले आफ्नो ८ बुँदे चुनावी एजेन्डा समेत सार्वजनिक गरेका छन् ।
अन्तर्राष्ट्रिय विद्यार्थीको हैसियतमा वेस्ट्रन अष्ट्रेलियाको पर्थमा बसोबास गदै आएका उनी नेपाली समुदाय, यसका गतिविधिहरू, समस्या, सम्भावना र सामुदायिक दायित्वलाई महसुस गरी आफ्नो उम्मेदवारी दिएको उनले बताएका छन् । नेपाली युवाहरूको प्रोत्साहन र सशक्तीकरणको लागि सधैँ अग्रसर रहने सिग्देलले विभिन्न किसिमका युवाहरू लक्षित धेरै कार्यक्रमहरू आयोजना र संयोजन गरिसकेका छन् ।
नेपाली युवाहरूलाई एकजुट गराउन आफूले विभिन्न खेलकुद गतिविधिहरू गदै आएको सिग्देलको भनाई छ । यस्तै पर्थमा रहेका नेपालीहरूको लागि वैदेशिक जीवनको परामर्श दिइने, गैर आवासीय नेपालीहरूको हक हितको पक्षमा आवाज उठाउने, सवारी सम्बन्धी जानकारी, नयाँ बिद्यार्थीहरुको लागि आवश्यक समन्वय, कर र रोजगार सम्बन्धी जानकारी दिने जस्ता सामाजिक कार्य समेत उनले आयोजना गदै आएका छन् ।
कुरा भन्दा पनि कर्मले आफ्नो पहिचान बनाउनु पर्ने मूल उद्देश्य बोकेका सिग्देलले नवागन्तुक समर्थन र सहानुभूति कार्यक्रम, परिवर्तनका लागि युवा सोच, लागुऔषध तथा जुवाजन्य कार्यको दुरुपयोग रोकथाम, मानसिक स्वास्थ्य, सांस्कृतिक संरक्षण, सामुदायिक स्वयंसेवा, युवाहरूको लागि सिपमूलक तालिम, व्यावसायिकता प्रवर्द्धन कार्यक्रमहरू आफ्नो एजेन्डा रहेको बताएका छन् ।
निर्वाचनको लागि आफूले तयारी थालेको सिग्देलले जानकारी दिए । अग्रजहरूको साथ र सल्लाहबाट आफूले निर्वाचन जित्नेमा आशावादी रहेको उनको भनाई छ । सिग्देल वेस्ट्रन अष्ट्रेलियाको पूर्व स्नुकर तथा विलार्ड संघको केन्द्रीय सदस्य समेत हुन् । उनी पर्थको चर्चित इभेन्ट कम्पनी कर्मा इभेन्टको डाइरेक्टर हुन ।
