इलाका प्रहरी कार्यालय इटहरीका नयाँ डिएसपी टेक बहादुर कार्कीले शान्ति सुरक्षा र कानुन कार्यान्वयनमा कुनै सम्झौता नगर्ने बताएका छन् । इटहरीका संञ्चारकर्मीहरुसँग परिचय कार्यक्रममा बोल्दै कार्कीले इटहरीको शान्ति सुरक्षा, अपराध नियन्त्रण र कानुन कार्यान्वयनमा उदाहरणीय काम गर्ने बताएका छन् । प्रहरीको काम कारबाहीमा कसैको हस्तक्षेप नगर्न र नगराउन उनले आग्रह समेत गरेका छन् ।
इटहरीको समग्र समस्याका विषयमा अध्ययन गरेर उचित सुरक्षा योजना बनाउने डिएसपी कार्कीको भनाई छ । आफ्नो कार्यकालमा गर्न नहुने काम प्रहरीले नगर्ने र प्रहरी विरुद्ध कुनै पनि समस्या वा गुनासो भए सिधै आफूलाई सम्पर्क गर्न समेत स्थानीयहरूमा आग्रह गरेका छन् । आफ्नो कार्यकालमा गलत काम गर्ने जो कोही प्रहरीलाई कडा कारबाही गर्ने समेत उनले भनेका छन् ।
इटहरीको शान्ति सुव्यवस्था कायम गर्न सबैको साथ र सहकार्य प्रहरीलाई हुनु पर्ने उनको जोड थियो । जिल्ला प्रहरी कार्यालय मकवानपुरबाट इटहरी आएका कार्कीले लागु औषध नियन्त्रण र चाडपर्वमा हुने अपराध नियन्त्रणमा तत्काल कार्य योजना बनाइ काम गर्ने बताएका छन् ।
