सुनसरीको धरानस्थित केके इन्टरनेश्नल स्कुलले आफ्नो ८ औ वार्षिक उत्सव तथा अभिभावक दिवस मनाएको छ । विभिन्न कार्यक्रम गरी स्कुलले मसिंर २५, २६ र २७ गते तिन दिनको कार्यक्रम आयोजना गरी आफ्नो वार्षिक उत्सव तथा अभिभावक दिवस भव्य रूपमा मनाएको हो ।
कार्यक्रमको मुख्य आकर्षण स्कुलकै बिद्यार्थीद्धारा निर्माण गरिएको ड्रोनबाट अतिथिहरू तथा अभिभावकहरुलाई पुष्प वर्षा गरिएको थियो । प्रत्येक दिनका मुख्य अतिथिहरू तथा अभिभावकहरुलाई कक्षा ७, ८ र ९ मा अध्ययनरत विद्यार्थीले आफै निर्माण गरेको ड्रोनबाट पुष्प वर्षा गरिएको थियो । कोशी प्रदेशमा नै पहिलो पटक रोबोटिक्स कक्षा सञ्चालन गरेको केके इन्टरनेश्नल स्कुलले निर्माण गरेको ड्रोनबाट पुष्प वर्षा गराउँदा सबैको ध्यान खिच्न सफल भएको थियो । साथै वार्षिक उत्सवमा आएका अतिथिहरूले समेत विद्यार्थीको ड्रोन कलालाई प्रशंसा गरेका थिए ।
स्कुलले आफ्नो ८ औ वार्षिक उत्सवको मसिंर २५ गते कक्षा १ देखि ३ सम्मका बिद्यार्थीहरुको प्रतिभा अभिभावकहरुको उपस्थितिमा कार्यक्रम गरेको थियो । यस्तै कक्षा ४ र ५ का विद्यार्थीको मसिंर २६ गते र मसिंर २७ गते कक्षा ६ र ९ का बिद्यार्थीहरुको प्रतिभा प्रस्फुटन गरेका थिए । कार्यक्रमको पहिलो दिनको प्रमुख अतिथिमा शिक्षा विकास तथा समन्वय इकाई, सुनसरीका प्रमुख खगेन्द्र सुवेदी रहनु भएको थियो भने दोस्रो दिन धरान उपमहानगरका शिक्षा, युवा तथा खेलकुद महाशाखाका प्रमुख गणेश प्रसाद खतिवडा र समापन कार्यक्रममा धरान १५ का वडाध्यक्ष नरेश इवारम रहनु भएको थियो ।
कार्यक्रममा बिद्यार्थीहरुले जातीय तथा मौलिक नृत्य प्रस्तुत गरेका थिए । साथै सामाजिक सन्देश मूलक नाटक समेत मञ्चन गरेका थिए भने स्कुलका तेक्वान्दोका खेलाडीको ग्रेड वृद्धि गरिएको थियो । वार्षिक उत्सवमा प्रत्येक कक्षाका बिद्यार्थीहरुले अनिवार्य आफ्नो प्रस्तुति दिएको विद्यालयले जनाएको छ ।
कार्यक्रममा स्कुलका अध्यक्ष इन्जिनियर प्रवीण अग्रवाल, सञ्चालकहरू अशोक कुमार अग्रवाल, सुनिल अग्रवाल, गिरीधारी सापकोटा लगायतको उपस्थिति रहेको थियो ।
Copyright © 2019 / 2026 - Junkirikhabar.com All rights reserved
