वीपी कोइराला स्वास्थ्य विज्ञान प्रतिष्ठानको आफ्नो अक्सिजन प्लान्टले एक महिनादेखि अक्सिजन उत्पादन गर्न सकेको छैन । छ महिना अघि मात्र जडान गरेको नयाँ प्लान्ट पटकपटक बिग्रने गरेका थियो ।
प्रतिष्ठानले ३ करोड २४ लाख रुपैयाँ लगानी गरेर जडान गरेको प्लान्ट नै बिग्रेर अक्सिजन उत्पादन हुन नसकेपछि सुनसरीको खनारस्थित दुर्गा अक्सिजन प्लान्टबाट सिलिण्डरमा किनेर चलाइरहेको छ। अर्काको प्लान्टबाट अक्सिजन खरिद गर्दा प्रतिष्ठानलाई दैनिक ६० हजार रुपैयाँ देखि ८० हजार रुपैयाँ व्ययभार हुने गरेको छ। प्रतिष्ठानमा नेपालको युनिषि इण्डिया र नेपालको डाइग्नोकेनले अक्सिजन प्लान्ट जडान गरिदिएका हुन्।
दुर्गा प्लान्टले पनि पर्याप्त अक्सिजन सिलिण्डर उपलब्ध गराउन नसकेपछि प्रतिष्ठानको बिरामी बस्ने वार्डमा आपूर्ति गर्न नसकेको प्रतिष्ठान श्रोतले जनाएको छ। अक्सिजन आपूर्ति गर्न नसक्ने भएपछि अक्सिजन अनिवार्य चाहिने बिरामीलाई वार्डमा भर्ना गर्न नसकिएको एक चिकित्सकले बताए। ती चिकित्सकले भने, ‘अक्सिजन अभावले वार्डमा भर्ना नै बन्द गर्नुपरेको छ। भर्ना गर्दा अक्सिजन चाहिन्छ, तर पर्याप्त अक्सिजन आपूर्ति हुन सकेको छैन।’
प्रतिष्ठानका निमित्त उपकुलपति प्राडा गुरु खनालले बिग्रेको अक्सिजन प्लान्ट मर्मत गर्न दुइसाता देखि प्रयास गरिरहेको बताए। उनले भने, ‘मर्मत गरेर अक्सिजन उत्पादन गर्ने प्रयास गरिरहेका छौं। अबको दुई सातामा दुरुस्त बनाएर आफैं अक्सिजन उत्पादन गर्ने छौं।’
Copyright © 2019 / 2026 - Junkirikhabar.com All rights reserved
