कोसी प्रदेशका मोरङ र झापामा हात्तीको समस्या अहिले पनि उस्तै रहेको छ । बेलाबेला मात्रै आउने हात्तीका बथान अहिले यतै रमाउँदा स्थानीयबासीका लागि समस्या भएको हो । खासगरी झापा र मोरङमा हात्तीको उपद्रो बढेको छ भने सुनसरीमा पनि बेलाबेला हात्ती आक्रमण भइरहेको छ । हात्तीको आक्रमणबाट साउनयता मात्रै ७ जनाको मृत्यु भइसकेको छ ।
चालु आर्थिक वर्षको हालसम्म झापामा ५ तथा मोरङ र सुनसरीमा १–१ जनाको मृत्यु हात्तीको आक्रमणबाट भएको हो । यसबीचमा १० जना घाइते भएका छन् ।
हात्तीले आक्रमण गरेर मोरङमा ४, झापामा ३, सुनसरीमा २ र उदयपुरमा १ जनालाई घाइते बनाएको छ ।
आक्रमणबाट झापामा शुक्रबार मात्रै एकजनाको मृत्यु भएको छ । शिवसताक्षी नगरपालिका ११ सृष्टि टोलका ४५ वर्षीय मेघराज राईको मृत्यु भएको हो । हात्तीले राईको घर पनि भत्काएको छ । हात्तीको बथानले साउनयता मात्रै झापामा ४९, मोरङमा २६, सुनसरीमा ५ र उदयपुरमा १ गरेर ८१ वटा घटना गराएको छ ।
कोसी प्रदेश प्रहरी कार्यालय विराटनगरका प्रवक्ता एसपी ऋषिराम कँडेलका अनुसार झापामा ५४, मोरङमा १६ र सुनसरीमा ३ गरेर ७३ वटा घरमा क्षति पुर्याएको छ । मोरङमा ८१ र झापामा २ वटा गोठमा क्षति गरेको उनले बताए ।
किसानले ७ बिघा १५ धुर क्षेत्रफलमा लगाएको बालीनाली नष्ट गरिसकेको एसपी कँडेलको भनाइ छ ।
हात्तीले हालसम्म ३ वटा जिल्लामा ४८ लाख ७४ हजार रूपैयाँभन्दा बढीको क्षति गरेको उनले बताए । उनकाअनुसार सबैभन्दा धेरै झापामा ३७ लाख ६८ हजार बढीको क्षति पुर्याएको छ ।
भारतबाट झापा हुँदै नेपाल प्रवेश गरेका हात्ती पूर्वी मोरङ र झापाका जंगलमा बसिरहेका छन् । डिभिजन वन कार्यालय झापाका प्रमुख मेघराज राईले हात्ती आक्रमणबाट सर्वसाधारणमा त्रास बढेको उल्लेख गरे । भारतबाट झापा हुँदै छिरेको २७ वटाजतिको हुल मोरङतिर लागेको र साथमा बच्चा (छावा) पनि रहेको उनको भनाइ छ ।
बच्चा हुर्काउनतिर लागेकाले त्यो हुल हालसम्म नफर्किएको राईले बताए ।
उनले भने, ‘झापाका जंगलमा पनि झुण्ड–झुण्ड भएर बसेका छन् । एउटा झुण्डमा १० वटासम्म छन् । झापामा मात्रै ३७ देखि ४० वटा हात्ती रहेको अनुमान छ ।’
Copyright © 2019 / 2026 - Junkirikhabar.com All rights reserved
