धरानका स्थानीय उत्पादन, कृषि उपज प्रवद्र्धन र आर्थिक गतिविधि बढाउने उद्देश्यका साथ सुनसरी उद्योग वाणिज्य संघले ‘धरान एक्स्पो’ आयोजना गर्ने भएको छ । ‘धरान एक्स्पो’ नामकरण गरिएको कृषि, पर्यटन, कला–संस्कृति, शिक्षा, खेलकुद तथा औद्योगिक, व्यापार प्रदर्शनी आगामी फागुन ११ देखि २३ गतेसम्म आयोजना हुने छ । यो प्रदर्शनी संघले दोस्रो पटक आयोजना गर्न लागेको हो ।
‘एक्स्पो’ बारे जानकारी दिन शुक्रबार आयोजित पत्रकार सम्मेलनमा संघका अध्यक्ष विजय श्रेष्ठले ‘धरान एक्स्पो’ ले धरानका व्यापारी, व्यवसायी, स्थानीय उद्यमीमा नयाँ उत्साह थप्ने र बजारमा आर्थिक चहलपहल ल्याउने विश्वास व्यक्त गरे ।
अध्यक्ष श्रेष्ठका अनुसार ‘एक्स्पो’ मा १५० वटा स्टल रहने छन् । ५ लाख जनाले ‘एक्स्पो’ को प्रत्यक्ष अवलोकन गर्ने अनुमान गरिएको छ । ‘एक्स्पो’ मा स्थानीय उत्पादन बेसार, कालो बंगुर, तीनपाने, अदुवा, अम्लिसोलाई प्रवर्धन गर्दै स्थानीय आर्थिक गतिविधि बढाउन लक्षित हुने छ । स्थानीय उत्पादनसँगै धनकुटा, इलाम, तेह्रथुम लगायतका पहाडी जिल्लाका उत्पादनलाई समेत प्राथमिकता दिएर बिक्री वितरणका लागि राखिने छ । ‘धरान एक्स्पो’ मा १६ करोड रुपैयाँभन्दा बढीको कारोबार हुने अनुमान गरिएको छ ।
Copyright © 2019 / 2025 - Junkirikhabar.com All rights reserved
