इटहरीमा दैनिकजसो हात्तीका बथान मानव बस्तीमा पस्ने संकेत देखिएपछि खाडल खन्न सुरु गरिएको छ । इटहरी उपमहानगरपालिका २ शान्तिनगरमा दैनिकजसो दुई दर्जन बढी हात्तीको संख्या आउने गरेको र मानव बस्तीमै पस्ने संकेत देखिएपछि वारपार खाडल खन्न सुरु गरिएको हो ।
इटहरी उपमहानगरपालिकाका मेयर हेमकर्ण पौडेलसँगको समन्वयमा उपमहानगरकै जेसीभीले खाडल खन्ने काम भइरहेको स्थानीय रोशन अधिकारीले बताए ।
उनका अनुसार इटहरी–धरान सडकखण्डको तरहरास्थित पानीपियादेखि इटहरी २ प्रवेश गर्ने हात्ती चोकसम्म क्षेत्रीय कृषि अनुसन्धान निर्देषनालयको जमिनमा पर्ने क्षेत्रमा ६ फिट अग्लो खाडल खन्न सुरु गरिएको हो ।
यसैगरी हात्ती चोक पूर्व सेरा खोलासम्मको क्षेत्रमा उपमहानगरपालिकाको सहयोगमा खाडल खन्ने काम धमाधम भइरहेको अधिकारीले बताए । उनका अनुसार केही दिनअघि मात्रै पनि २९ वटा संख्यामा हात्तीका बथान आएका थिए । त्यसमा केही छावा (बच्चा)समेत रहेका छन् । हात्ती मानव बस्तीमा प्रवेश गरी धनजनको क्षति हुन नदिनका लागि खाडल खन्न बाध्य भएको स्थानीयबासीको भनाइ छ । पछिल्लोपटक १८ दिनयता दैनिक रात र बिहानको समयमा हात्तीका बथान मानव बस्तीमा पस्ने प्रयास भइरहेको स्थानीयबासीले बताएका छन् ।
स्थानीयका अनुसार हाल आलोपालो गरी रातभर जाग्राम बसेर दाउरा बालेर, साइरन बजाएर हात्ती धपाउने काम भइरहेको छ । यद्यपि, दैनिक हात्तीका बथान आउन थालेकाले आजित भएपछि खाडल खनिएको बताइन्छ ।
Copyright © 2019 / 2026 - Junkirikhabar.com All rights reserved
