फागुन २०, २०८०
जुनकिरी खबर

इटहरीमा बाँदर आतङ्कः

कोशी प्रदेशको पहाडी भेगहरूमा बाँदर आतङ्कले बसाइ सर्ने क्रम बढ्दो छ । बाँदर नियन्त्रणका लागि भोजपुरमा स्थानीयले प्रहरी प्रशासन नै गुहार्नुपरेको अवस्था छ ।

अझ पोखरा महानगरपालिका–१९ का वडाध्यक्षले त रुख काट्ने अभियान नै चलाए । तर, सुनसरीको इटहरीमा भने बाँदर धपाउनेभन्दा पनि त्यसको संरक्षण गर्नेतर्फ स्थानीयहरू लागिपरेका छन् । इटहरी–३ तालतलैया र खोर्साने खाप आसपास अहिले बाँदर आतङ्क बढ्दो छ । घरमा राखिएको अन्न, खानेकुरा सबै बाँदरले खाएर नष्ट गर्ने गरेको छ । अझ साना केटाकेटीलाई त झम्टिने, चिथोर्नेसमेत गरेको स्थानीयहरू बताउँछन् ।

स्थानीयले बजारबाट गुलेली किनेर ल्याई बाँदर नै मार्ने योजना पनि बनाए तर, त्यो योजना पनि लागू गरेनन् । बाँदर आतङ्कले सीमा नाघेपछि स्थानीयले प्रहरी प्रशासन र वडा कार्यालयसँग सहयोग मागेको इटहरी–३ का स्थानीय मणिकुमार चाम्लिङ बताउँछन् ।

इटहरी–३ का वडाध्यक्ष उमेश सुवेदीका अनुसार बाँदर धपाउने योजना लिएर गाउँ जाँदा स्थानीय आफैले धपाउनेभन्दा संरक्षण गर्ने उपाय निकाल्न सुझाव दिएको बताउँछन् । वनजङ्गल मासिएर आहारा नपाएपछि दैनिक ६० वटाभन्दा बढीको सङ्ख्यामा बाँदरहरू गाउँ पसेको स्थानीय बताउँछन् । बाँदरले स्थानीय तुला राई, मणि राई, शकुन्तला देवी, कोपिला घिमिरे, मानुषी राई, सन्ध्या श्रेष्ठ, मनोज गुरुङ, तरुण राईलगायतको घरमा बढी क्षति पु¥याएको पाइएको छ ।

पाकेको खाना खाइदिने, अन्न नष्ट गर्ने, भौतिक सामग्री क्षतविक्षत बनाउने, फर्निचर बिगार्नेदेखि थाल, बटुको नै बोकेर कुद्नेजस्ता प्रवृत्ति बढेपछि स्थानीय हैरान बनेका छन् । यता जङ्गलबाट आएको बाँदरलाई जङ्गलमै रोक्न वडा कार्यालयले शनिबार फलफूलको बिरुवा रोपेको छ । पहिलो चरणमा सय वटा फलफूलको बिरुवा रोपेको र यो अभियान वर्षैभरि चलाइने इटहरी–३ का वडाध्यक्ष सुवेदीले बताए ।