इटहरीमा भैँसी प्रतियोगिता आयोजना गरिएको छ । भैँसी पालन गर्दै आएका किसानहरू अन्य पशुपालन तर्फ परिवर्तन हुन थालेपछि भैँसी पालक किसानहरूको प्रोत्साहन गर्न प्रतियोगिता आयोजना गरिएको हो ।
इटहरीमा रहेको दुग्ध उत्पादक सहकारी संस्था लिमिटेडले सुनसरी र मोरङ जिल्लामा भैसीपालन गर्दै आएका किसानहरू बिच प्रतिस्पर्धा आयोजना गरेको हो ।
दुग्ध उत्पादक सहकारी संस्थाको ४२ औँ स्थापना दिवसको अवसरमा प्रतियोगिता आयोजना गरिएको संस्थाले जनाएको छ । सुनसरीको इटहरी र मोरङको सुन्दरहरैचाका ३० जना किसानका ५० वटा भैँसी प्रतियोगितामा सहभागिता गराइएको थियो ।
प्रतियोगितामा इटहरी ३ का चन्द्र बहादुर बस्नेतको भैँसी प्रथम भएको छ । यस्तै सुन्दरहरैचा ५ की पदम कुमारी राईको भैँसी दोस्रो तथा सोही स्थानका भोजराज गौतमको भैँसी तेस्रो भएको छ ।
यसै गरी सुन्दरहरैँचा ५कै तीर्थ कुमारी लिम्बुको भैँसी सान्त्वना भएको कार्यक्रम संयोजक तथा संस्थाका सचिव राजन धमलाले जानकारी दिए । भैँसी प्रतियोगिताका निर्णायकमा भेटनरी अस्पताल सुनसरीका प्रमुख कुमार सिंह खत्री, इटहरी उपमहानगरपालिकाका पशुपक्षी शाखाका प्रमुख डा. दुर्गा बहादुर श्रेष्ठ र ईलारी संस्थाका कार्यक्रम संयोजक एणमणि नेपाल रहेका थिए ।
भैँसीको स्वास्थ्य, रूप, जिउ डाल, जात, दूधको उत्पादन लगायतका गुणका आधारमा तीन सदस्य निर्णायक टोलीले विजेता भैँसी घोषणा गरेका थिए ।
