आयोजक राष्ट्रिय जागृति क्लब १४ औँ संस्करणको अन्तर्राष्ट्रिय आमन्त्रण कन्ट्रोल इटहरी गोल्ड कपको अन्तिम चारमा पुग्न सफल भएको छ ।
इटहरी रङ्गशालामा आइतबार राती सम्पन्न दोस्रो क्वाटरफाइनल खेलमा आयोजकले पाहुना टोली कञ्चनजङ्घा फुटबल क्लब भारतलाई पेनाल्टी सुट आउटमा ५-४ गोल अन्तरले पराजित गर्दै सेमिफाइनलमा स्थान सुरक्षित गर्न सफल भएको छ ।
निर्धारित ९० मिनेटको खेलमा दुवै टिमले १-१ गोलको बराबरी खेलेपछि खेलको निर्णय सिधै पेनाल्टी सुट आउटबाट लिइएको हो ।
पेनाल्टीमा एरिन तामाङको प्रहार बाहिरिएपछि कञ्चनजंगा क्वाटरफाइनलमै घर फर्कन बाध्य भयो । उसका चार जना खेलाडी अभिषेक लामा, निवाङ तामाङ, पूजन सुब्बा, र सरोनको प्रहार मात्र गोलमा परिणत भएको थियो ।
आयोजकको तर्फबाट पाँचै जनाले गोल गरे । योगेन्द्र कार्की, प्रवेश दनुवार, विशाल भण्डारी, उमेश कार्की र अन्तिम पेनाल्टी प्रहार गर्न आएका विदेशी खेलाडी नपोलिनको प्रहारले सिधै जाली चुमेपछि आयोजकको जित निश्चित भएको हो ।
त्यसअघि निर्धारित समयको १३ औँ मिनेटमा एरिन तामाङको पासमा पूजन सुब्बाले गोल गर्दै कञ्चनजंगालाई अग्रता दिलाएका थिए । तर उसको अग्रता ८६ औँ मिनेटमा आयोजकका नपोलिनले गोलगरेपछी खेल १-१ को बराबरीमा आएको थियो ।
आजको विजेता आयोजकले अब सेमिफाइनलमा चर्च ब्वाइज युनाईटेड र न्युरोड टिम एनआरटीबिच मंगलबार हुने अन्तिम क्वाटरफाइनल खेलको विजेतासँग बिहीबार प्रतिस्पर्धा गर्नेछ । आइतबारको खेलको म्यान अफ द म्याच विजयी टिमका नपोलिन घोषित भए । उनले नगद १० हजार रुपैयाँ पुरस्कार प्राप्त गरेका छन् ।
