कोशी प्रदेशमा नयाँ सरकार बनाउने विषयमा एमाले र माओवादीबिच नै विवाद देखिएको छ । प्रमुख दुई दलबिचको विवादकै कारण कोशीमा तत्कालै नयाँ सरकार गठन हुने सम्भावना कम हुँदै गएको छ ।
केही दिन अगाडि भएको कुराकानीमा नेकपा एमाले कोशी प्रदेश संसदीय दलका नेता हिक्मतकुमार कार्कीले वर्तमान सरकार एक महिनाभित्र परिवर्तन हुने दाबी गरेका थिए । ‘अहिलेको यो सरकार बढीमा एक महिनामा स्वतः परिवर्तन हुन्छ,’ उनले भनेका थिए ।
तर, केन्द्रीय सत्ता गठबन्धनकै महत्त्वपूर्ण घटक नेकपा माओवादी केन्द्र कोशी प्रदेश संसदीय दलका नेता इन्द्रबहादुर आङ्बोले भने तत्काल सरकार फेरबदल गर्नुपर्छ भन्ने एमालेको कुरा नै अधैर्य र अपरिपक्व रहेको बताएका छन् । उनले भने, ‘हाम्रो प्रदेशको अरु प्रदेशभन्दा फरक स्थिति छ । हामी अहिले संविधानको धारा १६८ को उपधारा ५ को सरकारमा छौँ । उपधारा ५ मा कसले पु¥याएको हो ? यो त एमालेले पु¥याएको हो नि ! माओवादीलाई सरकारको नेतृत्वमा पुग्न नदिनका लागि यो अवस्थामा एमालेले पु¥याएको हो ।’
यसको वस्तुनिष्ठ समीक्षा हुनुपर्ने आङ्बोको भनाइ छ । उनले एमालेले चालेका विगतका कदम सम्झाउँदै भने, ‘अर्को कुरा, यो सरकारलाई विस्थापित गरेर नयाँ सरकार बनाउने संवैधानिक र कानुनी आधार के हुन् ? यो विषयमा दलहरूका साथै संविधानविद् र कानुनका जानकारहरूसँग छलफल हुनुपर्छ ।’
त्यसपछि मात्र कसरी अगाडि बढ्ने भन्ने निष्कर्ष निकाल्न सकिने उनको भनाइ छ । ‘अहिले उत्ताउलो र उट्पट्याङ तरिकाले सरकारको विपक्षमा र माओवादीसहित गठबन्धन दलहरू सरकारबाट फिर्ता हुनुपर्छ भनिरहेको अवस्था छ,’ उनले भने, ‘यो अधैर्यता हो र यसले राजनीतिक निष्कर्ष निस्कँदैन ।’
उनले केन्द्रमा पनि कोशी प्रदेश सरकार एमालेको भागमा परेको कुरा जानकारीमा नआएको बताए । ‘हामीले बुझेअनुसार प्रदेशको बारेमा शीर्ष नेताहरूमा समझदारी भएको बुझेका छैनौँ । ठुलो पार्टीको रुपमा एमालेको दाबी स्वाभाविक पनि हो । तर, यो प्रदेशमा एमालेले हतारो गरेर प्रदेशलाई अर्को राजनीतिक अन्यौलता र अस्थिरतातर्फ लैजाने पक्षमा हामी छैनौँ,’ आङ्बोले भने ।
Copyright © 2019 / 2026 - Junkirikhabar.com All rights reserved
