दुर्गा प्रसाईँ नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियान इटहरी बृहत् रूपले आयोजना हुने भएको छ । सो कार्यक्रममा स्वयम दुर्गा प्रसाईँ समेत उपस्थित हुने छन् । अभियानका इटहरी संयोजक शरद तामाङले जेठको अन्तिम साता इटहरीमा लाखौ जनाको उपस्थितिमा कार्यक्रम गर्ने जानकारी दिए । इटहरीमा अभियानको लागि २० वटै वडाहरूमा समिति निर्माणको काम अन्तिम चरणमा पुगेको समेत तामाङले जानकारी दिए ।
देशको पछिल्ला राजनीतिक तथा आर्थिक अवस्था विरुद्ध अभियान केन्द्रित हुने जनाइएको छ । बैङ्क वित्तीयले गरिब जनतालाई चर्को ब्याजमा पीडित बनाएको विषयमा समेत पीडितहरूसँग प्रसाईँले भेट तथा अन्तरक्रिया गर्ने कार्यक्रम रहेको छ । कार्यक्रम तयारीको लागि विभिन्न उपसमिति समेत निर्माण गरिने इटहरी संयोजक तामाङले जानकारी दिए । इटहरीमा हुने कार्यक्रमको लागि काठमाडौँ, पोखरा, धरान, ताप्लेजुङ, धनकुटा, खोटाङ, उदयपुर लगायतका विभिन्न जिल्लाबाट उल्लेखित सहभागी हुने जनाइएको छ । कार्यक्रमको लागि बिहीबारबाट प्रचार प्रसारको काम सुरु गरिएको तामाङले जानकारी दिए ।
