इटहरी उपमहानगरपालिकाका मेयर हेमकर्ण पौडेलले रास्वपा सांसद अशोक कुमार चौधरीलाई धेरै बकबक नगरी भ्रष्टाचार प्रमाणित गरेर देखाउन चुनौती दिएका छन् । शुक्रवार सामाजिक सञ्जालमा भिडियो सन्देश मार्फत उनले बिहीबार चौधरीले प्रतिनिधिसभामा उठाएको विषयलाई प्रमाणित गर्न चुनौती दिएका हुन् ।
प्रतिनिधिसभा सदस्य चौधरीले बिहीबार इटहरीको विद्युतीय बस खरिदमा भ्रष्टाचार भएको, सिट स्क्यान मेसिन खरिदमा मिलेमतो देखिएको र जनदबाब पछि प्रक्रिया रोकिएको विषय उठाएका थिए । सोही क्रममा शान्ति सृजना माविमा ८० लाख बढी रकम भएको विषयमा पनि मिलेमतो भएको उनले वक्तव्य दिएका थिए ।
सांसद चौधरीको सोही अभिव्यक्तिले भ्रम सृजना गरेको भन्दै मेयर पौडेलले ठाडो चुनौती दिएका हुन् । सांसद जस्तो गरिमामय पदमा रहेको व्यक्तिलाई सार्वजनिक खरिद ऐनको विषयमा जानकारी हुनुपर्ने बताउँदै उनले छानबिन समिति गठन गर्न र अख्तियार दुरुपयोग अनुसन्धान आयोगमा उजुरी दिएर प्रमाणित गर्न चुनौती दिए ।
स्टन्ट र लोक रिझ्याइको लागि रास्वपा सांसदले अभिव्यक्ति दिएको उनको भनाइ छ । नगरवासी र नगरपालिकाको विषयमा विशेष अदालत र अख्तियार जस्तो गरी दोषी करार गरेको मेयर पौडेलले बताए । सांसद भएर बकबक नगर्न चेतावनी दिँदै उनले आग्रह र पूर्वाग्रहका आधारमा टिप्पणी नगर्ने चुनौती दिए ।
Copyright © 2019 / 2026 - Junkirikhabar.com All rights reserved
