प्रहरी प्रधान कार्यालय मानव श्रोत विकास विभागको असोज ७ गतेको सरुवा निर्णय अनुसार इलाका प्रहरी कार्यालय इटहरीको १३ औँ नयाँ डिएसपीमा लक्ष्मी भण्डारीले आफ्नो कार्यभार सम्हाली सकेका छन् । असोज १४ गतेबाट भण्डारीले इटहरीमा आफ्नो कार्यभार सम्हालेका हुन ।
यस अघि उनी जिल्ला प्रहरी कार्यालय मकवानपुरमा कार्यरत थिए । चाडपर्वको सँघारमा इटहरीको शान्ति सुरक्षा र कानुन कार्यान्वयनको कमान्डर बनेर आएका भण्डारीले दसैँ तिहार लक्षित विशेष सुरक्षा योजना तयार गरिरहेका छन् । यसै क्रममा डिएसपी भण्डारीले इटहरीका सामाजिक सङ्घसंस्था, नागरिक समाज तथा राजनीतिक दलहरूसँग परिचयसँगै अन्तकृया गरिरहेका छन् । परिचयसगैको अन्तकृयामा इटहरीको शान्ति सुरक्षाको अवस्था र चुनौतीका विषयमा सबैको राय सुझाव पनि लिइरहेका छन् ।
बुधवार भने डिएसपी भण्डारीले इटहरीका सञ्चारकर्मीहरूसँग परिचय र अन्तरक्रिया गरे । प्रहरी कार्यालयमै आयोजित कार्यक्रममा इटहरीको शान्ति सुरक्षा कायम राख्न सञ्चारकर्मीले विभिन्न सुझावहरू दिएका छन् ।
सञ्चारकर्मीसँग कुरा गदै डिएसपी भण्डारीले केही दिनभित्रै चाडपर्व लक्षित सुरक्षा योजना सार्वजनिक गर्ने जानकारी गराए । डिएसपी भण्डारीले इटहरीको समग्र शान्ति सुरक्षा कायम राख्न नागरिक स्तरबाट पनि सुझाव मागेका छन् ।
भण्डारी झापा निवासी हुन । उनी यस अघि इलाका प्रहरी कार्यालय पथरी, जिल्ला प्रहरी कार्यालय मोरङ र कोशी प्रदेश प्रहरीको रिट इन्र्चाजको रूपमा कार्यरत थिए । उनी २०७५ सालको चर्चित ३३ केजी सुन प्रकरणको अनुसन्धान अधिकृत मध्ये एक थिए ।
