‘वान–एक्स बेट’ मार्फत अनलाइन सट्टेबाजी गेम खेलाउने तीन जनालाई इटहरी प्रहरीले पक्राउ गरेको छ । इटहरी उपमहानगरपालिका ६ स्थित सङ्गीत चौकको इडिङ्गो होटलबाट उनीहरुलाई पक्राउ गरिएको इलाका प्रहरी कार्यालय इटहरीका प्रमुख तथा प्रहरी नायव उपरिक्षक लक्ष्मी प्रसाद भण्डारीले जानकारी दिए ।
पक्राउ पर्नेमा इटहरी २० का ३० वषीैय रञ्जित भनिने राजेन्द्र थापा मगर, इटहरी ४ का ३२ वर्षीय सरोज कार्की र इटहरी ९ का ४१ वर्षीय अमित भनिने किरण श्रेष्ठ रहेका छन् ।
उनीहरुले होटलमा बसेर अनलाइन सट्टेबाजी गेम खेलाउने गरेको सूचनाका आधारमा प्रहरीले पक्राउ गरेको हो । उनीहरु माथी थप अनुसन्धानका लागि सुनसरी जिल्ला अदालतबाट ७ दिनको म्याद थप गरी अनुसन्धान अगाडी बढाइएको प्रहरी नायव उपरिक्षक भण्डारीले जानकारी दिए ।
पक्राउ परेका उनीहरुको साथबाट सट्टेबाजी खेल खेल्न, खेलाउन रकम जम्मा गर्न र झिक्न प्रयोग हुने एप्लिेकशन र मोबाइल फोन बरामद गरिएको प्रहरीले जनाएको छ । घटनामा संलग्न अन्य व्यक्तिहरुको पनि खोजी भइरहेको इटहरी प्रहरीले जनाएको छ ।
Copyright © 2019 / 2026 - Junkirikhabar.com All rights reserved
