आन्तरिक राजश्व कार्यालय धरानले स्थानीय व्यवसायीहरूलाई २०५५ साल यता आयकर बुझाएको विवरण माग गर्दै पत्राचार गरेपछि स्थानीय व्यवसायीहरूमा कर आतङ्क फैलिएको बेला सुनसरी उद्योग वाणिज्य सङ्घले आइतबार विज्ञप्ति जारी गरेको छ ।
विज्ञप्तिमा भनिएको छ ‘विगत वर्षहरूमा आन्तरिक राजश्व विभागको म्यानुअल सिस्टम भएकोले त्यसरी म्यानुअल रूपमा बुझाएका विवरणहरू सिस्टममा नदेखिएको कारणले दुविधा भएको छ ।’
म्यानुअल सिस्टमबाट विवरण बुझाएका करदाताले विवरण बुझाएको भए दोहोरो रूपमा बुझाउनु नपर्ने कुरा राजश्व कार्यालय धरानका प्रमुखसँग पटक पटक भएको छलफलमा प्रष्टीकरण दिएको विज्ञप्तिमा उल्लेख छ ।
‘तर विभिन्न कारणले आय विवरण दाखिला गर्न बाँकी भई नन्फाइलर देखिएका उद्योगी तथा व्यवसायीले फागुन मसान्त भित्र आय विवरण पेस गरेमा छुट सुविधा हुने’ विज्ञप्तिमा उल्लेख छ ।
आन्तरिक राजश्व कार्यालयको पत्राचारले विशेष गरी ससाना व्यवसायीहरू माथि ठुलो प्रहार भएको छ । हठात् ३० वर्ष अघि देखीको आय विवरण माग गरिएपछि उनीहरूमा ‘कर आतङ्क’ मच्चिएको छ ।
म्यानुअल सिस्टममा विवरण बुझाएका व्यवसायीहरू समेतलाई पत्राचार गरिएकाले उनीहरूको भनाई छ ‘आन्तरिक राजश्व कार्यालयले म्यानुअल सिस्टममा विवरण सहित कर बुझाएकाहरूलाई आतङ्कित गरेको छ ।’
स्थानीय उद्यमी, व्यवासायीहरुले कर आतङ्कको बारेमा उद्योग वाणिज्य सङ्घमा गुनासो गरेपछि सङ्घले आन्तरिक राजश्व कार्यालयसँग पटक छलफल गरेको विज्ञप्तिमा उल्लेख छ ।
व्यवसायीहरूले राजश्व कार्यालय पहिले म्यानुअल सिस्टममा विवरण बुझाए/नबुझाएका करदाता बारे आफै स्पष्ट भएर मात्र पत्राचार गरिनु पर्ने जिकिर गरेका छन् ।
सङ्घले वक्तव्यमा ‘उक्त विषयमा उद्योगी, व्यवसायी साथीहरूले वास्तविक रूपमा नै आय विवरण बुझाउन बाँकी रहेको छ भने, भ्रामक हल्लाको पछि नलागी २०८१ फागुन मसान्त भित्रमा आफ्नो व्यवसायको विवरण बुझाउँदा छुट सुविधा उपलब्ध हुने’ जनाएको छ ।
Copyright © 2019 / 2026 - Junkirikhabar.com All rights reserved
