सुनसरीको किसानले पालेको बङ्गुरमा फैलिएको स्वाइन फिवरको प्रकोप नियन्त्रण हुन नसक्दा किसान चिन्तित भएका छन् । दुई साताअघि दुहबी र रामधुनी नगरपालिकाका किसानले पालेको बङ्गुरमा देखिएको अफ्रिकन स्वाइन फीवरको प्रकोप अहिले धरान उपमहानगरका फर्महरूमा देखिन थालेको छ ।
बङ्गुर पालनको लागि प्रसिद्ध मानिएको धरानमा पछिल्लो समय धमाधम बङ्गुर मर्न थालेपछि भेटेरिनरी अस्पताल तथा पशु सेवा केन्द्र सुनसरीले अनुगमन गरी स्वाब परीक्षणका लागि केन्द्रीय प्रयोगशाला काठमाडौँ पठाएको छ । अघिल्लो बर्सहरूमा पनि धरानमा किसानले पालेको बङ्गुरमा स्वाइन फिवरको प्रकोप देखिएको थियो ।
उक्त प्रकोपबाट धरानमा मात्र किसानले ३० करोड बराबरको क्षति ब्योहोर्नुपरेको थियो । यो वर्ष पनि अहिलेसम्म तीन दर्जन बढी बङ्गुर धमाधम मरिसकेकाले अफ्रिकन स्वाइन फीवरको प्रकोपको आशङ्का गरेर नियन्त्रणको पहल सुरु गरिएको भेटेरिनरी अस्पताल तथा पशु सेवा विज्ञ केन्द्र सुनसरीका निमित्त प्रमुख डां मनोज कुमार महतोले जानकारी दिए ।
धराने कालो बङ्गुरको नामले प्रसिद्ध रहेको धरानमा विगतमा जस्तो यो वर्ष पनि स्वाइन फिबर प्रकोप नियन्त्रण बाहिर जान सक्ने भयले किसान चिन्तित छन् ।
सुनसरीको धरान, इटहरी, रामधुनी, वराहक्षेत्र, दुहबी लगायतका स्थानीय तह बङ्गुर पालनको लागि प्रसिद्ध मानिन्छ ।
अफ्रिकन स्वाइन फिभर अत्यन्त सङ्क्रामक र घातक रोग हो । जसको मृत्युदर ९० प्रतिशत भन्दा बढीसम्म पुग्न सक्छ । यो रोग सिधै बङ्गुरबाट बङ्गुरमा मात्र नभई किर्ना, सङ्क्रमित भाँडाकुँडा, दूषित दानापानी, कपडा र सङ्क्रमित सुईहरूबाट पनि फैलिने चिकित्सकहरू बताउँछन् ।
