इटहरी उपमहानगरपालिकाका मेयर हेमकर्ण पौडेलले देशमै वित्तीय समस्या भइरहेको बेला इटहरीमा पनि समस्या भएको बताएका छन् । सङ्घीय सरकारले स्थानीय सरकारलाई दिने अनुदान समयमा दिन नसकेको कारण समस्या बढेको बताएका हुन् ।
बिहीबार सामाजिक सञ्जाल फेसबुक मार्फत उनले आर्थिक अभावले देशैभरका पालिकाहरू ग्रसित भएको उल्लेख गरे । इटहरीमा निर्माण कम्पनी र उपभोक्ता समितिको भुक्तानी नभएको कारण मेयर पौडेलको विरोध भइरहेको छ ।गत आर्थिक वर्षमा दिवा खाजा कार्यक्रमको ठेक्का पाएका समीर कार्कीले बारम्बार भुक्तानी नपाएको भन्दै सामाजिक सञ्जाल मार्फत विरोध जनाइरहेका छन् ।
कार्कीले मात्र हैन इटहरीको बसपार्क निर्माण सम्पन्न गरेर पनि भुक्तानी नभएपछि निर्माण कम्पनीले पालिकालाई हस्तान्तरण गरेको छैन । इटहरीमा निर्माणाधीन चिस्यान केन्द्रको काम पुरा नहुँदै निर्माण कम्पनी बाहिरिएको छ ।
यसअघि उपभोक्ता समितिले इटहरी उपमहानगरपालिका अगाडी आन्दोलन गरेका थिए । चालु आर्थिक वर्षको योजना सम्झौता नभएपछि भुक्तानीमा केही सहज भए पनि अघिल्लो आर्थिक वर्षको दायित्व बढी भएकाले भुक्तानी सन्तुलन बिग्रिएको हो ।
सोही विषयमा विरोध सुरुभएपछि मेयर पौडेलले प्रतिरक्षा गरेका हुन् । इटहरी उपमहानगरपालिकाको कार्यपालिका र नगर सभामा नेकपा एमालेको बहुमत भए पनि नागरिक प्रतिको कर्तव्य ख्याल नगरी छेपारो प्रवृत्ति अपनाएको आरोप लगाएका छन् ।
आफू सही र अर्को गलत भन्ने भाष्य निर्माण गरेर योजनाबद्ध प्रहार भइरहेको मेयर पौडेलको भनाइ छ । ‘आज देश मै वित्तीय समस्या छ । स्थानीय सरकारलाई दिएको अनुदान केन्द्र सरकारले समयमा दिन सकेको छैन । केही समस्या इटहरीमा पनि छन् । जुन समाधान हुने प्रकारका छन् ।
देशभरिका पालिकामा सानो ठुलो समस्या छन् तर इटहरीलाई दलका कार्यकर्ता र दलीय मुख पत्र सञ्चारमाध्यमबाट बदनाम गराईदैछ । इटहरी सरकारमा बहुमतमा बसेर जिम्मेवारी बहन गर्न नसक्ने नागरिक प्रतिको कर्तव्यको ख्याल नभएको छेपारो प्रवृत्ति ।
अथवा बिरालो धेरै भएर मुसा मार्न नसक्नुको दलीय छटपटी र आफू सही अर्को गलत भन्ने बुझाउने र भ्रम छर्ने योजनाबद्ध प्रहारको कारण यो वर्ष केही समस्या आफैँ उत्पन्न गरी बजारीकरण गरी रहेको तमाम इटहरीवासी सज्जन बौद्धिक नगरवासीहरूलाई जानकारी भएको कुरा हो,’ उनले लेखेका छन् ।
