इटहरी रंगशालालाई कोशी प्रदेशको प्रशिक्षण केन्द्रको रुपमा विकास गरिने युवा तथा खेलकुद मन्त्री तेजुलाल चौधरीले जानकारी दिए । देशभरका रंगशालाहरु मध्ये ठुला रंगशालालाई प्रदेश स्तरीय प्रशिक्षण केन्द्रको रुपमा विकास गर्ने सरकारको योजना अनुसार इटहरी रंगशाला प्रशिक्षण केन्द्र बन्ने मन्त्री चौधरीले स्पष्ट पारे ।
सनुसरीको इटहरीमा पत्रकारहरुसँग कुराकानी गर्दै मन्त्री चौधरीले संघीय सरकारले इटहरी रंगशालालाई प्रदेशमा हस्तान्तरण गर्ने र प्रशिक्षण केन्द्रको रुपमा विकास गर्ने योजना बनेको जानकारी दिए ।
मन्त्री चौधरीले भने, ‘ कोशी प्रदेशको तालिम केन्द्रको रुपमा संघले विकास गर्ने, भित्रका खेलाडी उत्पादन गर्न, त्यहाँ होस्टल राखेर हुन्छ कि कसरी हुन्छ, तालिम वा प्रशिक्षण दिने गरी विकास गर्ने योजना छ । ’
हाल संघीय सरकार अन्र्तगत रहेको इटहरी रंगशाला चाँडै प्रदेश सरकारलाई हस्तान्तरण गर्न तयारी अन्तिम चरणमा पुगेको उनले बताए । हाल संघीय सरकारले १० वटा संघ अन्र्तगत रहेका रंगशाला प्रदेश तथा स्थानिय तहमा हस्तान्तरण गर्ने प्रकृया अन्तिम चरणमा पुगेको उनले बताए ।
मन्त्री चौधरीका अनुसार रंगशालाका लागि आउँदै गरेको बार्षिक बजेटमा तोकिएरै बजेट विनियोजन गरिएको छ । विशेष गरी रंगशालाको भौतिक पूर्वाधार मर्मत तथा सम्भार शिर्षकमा बजेट विनियोजन गरिएको छ ।
यस्ता रंगशालाहरुलाई मर्मत गर्न भनेर ११÷१२ करोड रकम विनियोजन गरिएको जानकारी दिँदै मन्त्री चौधरीले त्यस मध्ये इटहरी रंगशालालाई पनि स्पष्ट बजेट तोकिएरै आउनेछ ।
८ विगाहा क्षेत्रफलमा फैलिएको सुविधा सम्पन्न इटहरी रंगशाला लामो समय देखी प्रदेश तथा स्थानिय तहलाई हस्तान्तरण गर्नुपर्ने माग उठ्दै आएको थियो ।
इटहरी रंगशालामा यस अघि सातौ राष्ट्रिय खेलकुद प्रतियोगिता,कराते, तेक्वान्दो सहित अन्य केही खेलका अन्तराष्ट्रिय प्रतियोगिता सम्पन्न भइसकेका छन् ।
नेपाली महिला राष्ट्रिय फुटबल तथा क्रिकेट टिमको बन्द प्रशिक्षण यहि रंगशालामा गरिएको थियो ।
Copyright © 2019 / 2025 - Junkirikhabar.com All rights reserved
