कोसी प्रदेशका दुई उपमहानगर इटहरी र धरानमा आजबाट बजेट शून्यता आएको छ । नगर सभाबाट आगामी आर्थिक वर्ष २०८२–८३ को लागि विनियोजित बजेट पारित हुन नसक्दा यी दुई उपमहानगरपालिकामा बजेट शून्यताको अवस्था सिर्जना भएको हो ।
धरान उपमहानगरकारका प्रमुख हर्क साम्पाङ र उपप्रमुख अइन्द्रबिक्रम बेघा बिचको मतभेदले आर्थिक वर्ष २०८२–८३ को बजेट पारित हुन नसक्दा उपमहानगर बजेट शून्यताको अवस्थामा पुगेको हो । अघिल्लो वर्ष पनि नगरप्रमुख हर्क साम्पाङ र वडाध्यक्षहरुबीचको विवादले निर्धारित समयमा बजेट पेस गर्न नसकेको धरान उपमहानगर यसबर्ष पनि किचलोमा फसेको छ ।
नगरप्रमुख र उपप्रमुख सहितका वडाअध्यक्षहरुको टकराब र आन्तरिक विवादका कारण पूर्वी नेपालको महत्त्वपूर्ण स्थानीय तह धरानमा बजेट प्रक्रिया ठप्प हुँदा नगरवासी चिन्तित बनेका छन् ।
धरानमा समयमै बजेट आउन नसक्नुको एउटा कारण श्रमदानको विषयमा उत्पन्न विवाद हो । असार २ र ३ गते श्रमदानको विषयलाई लिएर नगरप्रमुख र उपप्रमुखबिच उत्पन्न विवादले झडप नै भएको थियो । बजेट बनाउने अन्तिम समयसम्म उक्त विवाद नसुल्झिँदा यसको प्रभाव बजेट निर्माण प्रक्रियामा परेको हो ।
उपप्रमुख सहित २८ जना कार्यपालिका सदस्यले कानुनी प्रक्रिया र आवश्यक तयारी पूरा नगरी कार्यपालिका बैठक बस्नुको औचित्य नहुने भन्दै पत्र बुझाएपछि नगरप्रमुख साम्पाङ बैठक स्थगित गरेका थिए ।
बैठक बस्न नसक्दा धरान उपमहानगरले असार १० गते बजेट प्रस्तुत गर्न सकेको थिएन ।
त्यसयता पटक पटक प्रयास गरे पनि बजेट निर्माणको कामले पूर्णता नपाउँदा शून्यताको अवस्थामा पुगेको हो ।
इटहरी उपमहानगरपालिका पनि बजेट शून्यताको अवस्थामा पुगेको छ । असार १० गते उपमहानगरपालिकाका तर्फबाट उपप्रमुख संगीता कुमार चौधरीले प्रस्तुत गरेको नीति, कार्यक्रम र बजेट पारित नहुँदा होलीडेको अवस्थामा पुगेको हो ।
स्थानीय सरकार संचालन ऐनमा १० असारमा प्रस्तुत भएको नीति, कार्यक्रम र बजेट १५ दिन अर्थात् असार २५ गतेसम्म दफावार छलफल गरी पास गरिसक्नुपर्ने व्यवस्था गरिएको छ ।
तर, बजेट पास गर्ने विषयमा पटक पटक नगर सभा बोलाउँदै स्थगित गरेको उपमहानगरले बुधवार बोलाइएको नगरसभाको बैठक स्थगित भएकाले इटहरी बजेट होलीडेको अवस्थामा पुगेको हो ।
इटहरी उपमहानगरपालिका नगरप्रमुख हेमकर्ण पौडेलले अनुसूची विनाको बजेट पास गर्न खोजेपछि उपप्रमुख चौधरीले असहमति जनाएपछि बुधवारको नगर सभा अर्को सूचना जारी नभएसम्मका लागि स्थगित भएको हो ।
उपप्रमुख चौधरीले अनुसूची विनाको बजेट निर्णयका लागि नगर सभामा पेस गर्न नसकिने जानकारी दिएपछि नगर सभा प्रमुखका रूपमा उपस्थिति मेयर पौडेलले इटहरीवासीको भाग्य र भविष्यमाथि राजनीति गर्न नहुँने जनाउँदै सहमतिका साथ अगाडि बढ्ने विश्वास व्यक्त गर्दै अर्को सूचना जारी नभएसम्मका लागि नगर सभा स्थगित गरेका थिए ।
Copyright © 2019 / 2026 - Junkirikhabar.com All rights reserved
