पूर्वेली लोकगायिका अञ्जु गौतमले म्युजिक नेपालप्रति गम्भीर आपत्ति जनाएकी छिन्। उनका अनुसार, आफ्नै मौलिक गीतहरूमा अनावश्यक ‘कपिराइट’ विवाद खडा गरेर युट्युबबाट गीतहरू ब्लक गरिएको छ। बुधबार इटहरीमा पत्रकार सम्मेलन गर्दै उनले तीन चर्चित गीतहरू — लैबरी माया, पानी पर्यो झमझम र माला लाउनु फुलैको गाँसेर — म्युजिक नेपालका प्रमुख सन्तोष शर्माको पहलमा अनुचित रूपमा ब्लक गरिएको दाबी गरिन्।
उनले ब्लक हटाउन प्रमाणसहित आग्रह गर्दा समेत धम्की र दबाबमा पारिएको अनुभव सुनाइन्। प्रतिलिपि अधिकार ऐन २०५९ ले मौलिक सिर्जनालाई सुरक्षा गर्ने तर लोक भाका आत्मसात् गरेर सिर्जना गर्ने अधिकार भने कलाकारलाई खुला गरेको प्रस्ट पार्दै, आफ्ना गीत मौलिक परम्परामै आधारित भएको दाबी गरिन्। दुई दशकदेखि कोशी प्रदेशमा सक्रिय रहिएकी गौतमले अहिलेसम्म तीन सयभन्दा बढी लोकगीत गाइसकेकी छिन्। तर लोकप्रिय गीत ब्लक भएपछि आर्थिक र मानसिक दुवै असर परेको बताउँदै, अब कानुनी बाटो रोज्ने चेतावनीसमेत दिएकी छिन्।
Copyright © 2019 / 2026 - Junkirikhabar.com All rights reserved
