मोरङको उर्लाबारी नगरपालिकामा १८ दिनदेखि सेवा प्रवाह ठप्प छ । मेयर र उपमेयरको झगडा चर्कंदै जाँदा उच्च अदालत बिराटनगरको आदेशपछि नगरपालिकाको सेवा प्रवाह रोकिएको हो ।
कांग्रेसबाट निर्वाचित मेयर खड्ग फागो र नेकपाबाट निर्वाचित उपमेयर लक्ष्मीदेवी भण्डारीबीचको विवादका कारण १८ दिनदेखि काम ठप्प हुँदा सेवाग्राहीहरु मारमा परेका छन् । सेवाग्राहीसँग शुल्क लिएर गर्नुपर्ने कुनै पनि काम नगरपालिका र वडा कार्यालयहरुले गरेका छैनन् । शुल्क नलिइकन गरिने सामान्य सेवा मात्र सुचारु छ ।
गत असार २९ गते उर्लाबारी नगरपालिकाको चौथो नगरसभा भएको थियो । १९ जना कार्यपालिका सदस्य रहेको नगरमा मेयर खड्ग फागोसहित नेपाली कांग्रेसका ६ जना सदस्यले मात्र निर्णय गरेर चौथो नगरसभा डाकेका थिए । जबकि नगर कार्यपालिकामा नेकपाका १३ सदस्य छन् ।
कांग्रेसबाट निर्वाचितहरुले अल्पमतका आधारमा एकलौटी रुपमा नगरसभा गरेको भन्दै उपमेयर लक्ष्मीदेवी भण्डारीसहित १३ जनाले उच्च अदालत बिराटनगरमा रिट दायर गरे । सोही रिटमाथि सुनुवाई गर्दै उच्च अदालतले नगरसभाको निर्णय कार्यान्यन नगराउन आदेश दिएपछि नगरपालिकाको सशुल्क सेवा ठप्प भएको हो ।
असार २९ मा मेयर फागोको नेतृत्वमा सम्पन्न नगरसभाको निर्णय कार्यान्वयन नगर्न उच्च अदालतले साउन २७ गते आदेश जारी गरेर नगरपालिकालाई सोही दिन पत्र पठाएको थियो । सोही पत्रका आधारमा साउन १८ गते मेयर फागोले नगरपालिकामा प्रेस विज्ञप्ति टाँस गर्दै सम्पूर्ण वडा कार्यालयलाई समेत काम रोक्न निर्देशन दिएका हुन् ।
Copyright © 2019 / 2026 - Junkirikhabar.com All rights reserved
