भदौ २४ गते जेनजी आन्दोलनपछि सुनसरीको झुम्का कारागारबाट एकैपटक बाहिरिएका कैदीबन्दीमध्ये धेरैले आत्मसमर्पण गरेर पुनः कारागार प्रवेश गरिसकेका छन् । तर अझै पनि पाँच सय ७२ जना फरार कैदीबन्दी सम्पर्कविहीन छन् । जसले सुरक्षा निकायका लागि चुनौती सिर्जना गरेको छ । कारागार प्रमुख सुवास लामिछानेका अनुसार हालसम्म एक हजार २५९ जना कैदीबन्दीले स्वेच्छाले फर्किएका छन् । तर बाँकी पाँच सयभन्दा बढी अझै विभिन्न ठाउँमा लुकीछिपी बसिरहेको अनुमान गरिएको छ ।
फरारमध्ये ४९ जना भारतीय नागरिक रहेको पुष्टि भएको छ । झुम्कामा रहेका ६१ भारतीय कैदीमध्ये १२ जना मात्र फर्किएका छन् । बाँकी कैदी कहाँ गए भन्नेबारे प्रशासनसँग ठोस जानकारी छैन ।
कारागारमा आन्दोलन सुरु भएको राति ठूलो भीड र सुरक्षा व्यवस्थाको अभावबीच एक हजार ७९६ जना कैदीबन्दी बाहिरिएका थिए । त्यसपछि प्रहरी, सशस्त्र र प्रशासनले संयुक्त खोजी अभियान चलाउँदै आएका छन् ।
प्रशासनले असोज २० गतेसम्म आत्मसमर्पण गर्न सूचना जारी गरेको थियो, तर म्याद सकिएपछि पनि सयौं कैदी फर्किएका छैनन् ।
Copyright © 2019 / 2026 - Junkirikhabar.com All rights reserved
