इटहरी उपमहानगरपालिकाको हाता भित्र निर्माणाधीन सार्वजनिक शौचालय अलपत्र अवस्थामा छ । शिलान्यास भएको ६ वर्ष पुरा हुँदा समेत निर्माण सम्पन्न हुन नसकेको हो । इटहरीमा सार्वजनिक शौचालयको व्यापक माग भएपछि तत्कालीन मेयर द्वारिकलाल चौधरीले शिलान्यास गरेको शौचालय वर्तमान मेयर हेमकर्ण पौडेलले उद्घाटन गर्न नपाउने अवस्थामा पुगेको छ ।
पौडेलेको कार्यकाल डेढबर्ष पनि बाँकी नरहेको अवस्थामा शौचालय निर्माण सम्पन्न हुने छाँट देखिएको छैन । कोरोना महामारीकै बिच २०७६ साल पुस १७ गते इटहरी उपमहानगरपालिका र अङ्कित निर्माण सेवाबिच सम्झौता भएको थियो । ६३ लाख ६७ हजार लागतमा निर्माण हुन लागेको शौचालय २०७७ जेठ ३० गते भित्र निर्माण सम्पन्न गर्ने सम्झौतामा उल्लेख छ ।
कोभिड महामारीलाई देखाएर म्याद थप भए पनि पछिल्लो कार्यकालमा थप प्रगति हुन सकेको छैन । यसअघि आफ्नो कार्यकालको अन्त्यमा २०७८ फागुनमा तत्कालीन मेयर द्वारिकालाल चौधरीले शौचालय निर्माणको काम ९० प्रतिशत सम्पन्न भएको बताएका थिए । पूर्व मेयरकै दाबीलाई आधार मान्दा ४ वर्षमा १० प्रतिशत काम पनि सम्पन्न हुन सकेन । २०७९ वैशाखको निर्वाचन पछि नयाँ जनप्रतिनिधि आएपनि शौचालय पुरानै अवस्थामा छ । निर्माणाधीन शौचालयमा एकै पटक १५ जनाले प्रयोग गर्न सक्ने गरी बगैँचा, वाटर फाउन्टेन सेन्सर प्रविधिको धारा र ढोका रहने छन् ।
२०७९ असार २५ गते सम्ममा निर्माण सम्पन्न हुने दाबी गरेको उपमहानगरपालिकाले त्यसयता अन्य दुई वटा शौचालय निर्माण गरिसकेको छ । पूर्व बस स्टेण्ड र इटहरीको मुख्य चोकमा निर्माण सम्पन्न भएका शौचालयहरू प्रयोगमा आइरहेका छन् ।
