इटहरीमा सामुदायिक स्तरबाट सञ्चालित जनता बहुमुखी क्याम्पसमा अध्ययन गर्न आउने विद्यार्थीका लागि छात्र तथा छात्राका लागि अलग अलग छात्रावास निर्माण हुने भएको छ । छात्रावासको शनिवार सञ्चालक समिति अध्यक्ष विकास केसीले शिलान्यास गरे ।
झण्डै पाँच करोड खर्चेर छात्रावास निर्माण हुने भएको हो । सङ्घीय सरकारले चालु आर्थिक वर्षको बजेटमा बहुवर्षीय योजना अन्तर्गत बजेट छुट्याएर पहिलो किस्तामा एक करोड ४२ लाख रुपैयाँ निकासा भएसँगै शिलान्यास गरेर काम सुरुवात गरिएको हो । क्याम्पसले विद्यार्थीहरूको शैक्षिक अभिवृद्धि गर्ने विभिन्न योजना ल्याउने क्रममा छात्रावास पनि एउटा महत्त्वपूर्ण पक्षको रूपमा लिएको अध्यक्ष केसीले बताए ।
छात्रावासका लागि बहुवर्षीय योजना अन्तर्गत अहिले पहिलो चरणमा छात्र र छात्राका लागि अलग अलग एक तले भवनमा १४-१४ वटा कोठा निर्माण हुनेछन् । निर्माणका लागि चारुमति कन्स्ट्रक्सन प्रालि वानेश्वर काठमाडौँले ठेक्का पाएर काम थालेको हो । ठेकेदार जीवन तिम्सिनाका अनुसार अहिले पहिलो चरणको काम २०८४ पुस मसान्तभित्र पुरा गर्ने सहमति भएको छ ।
Copyright © 2019 / 2026 - Junkirikhabar.com All rights reserved
