विराटनगर । बैशाख अन्तिम साता धरानमा देखिएको डेंगु संक्रमण एक नम्बर प्रदेशको ४ वटा जिल्लामा फैलिएको छ । सुनसरी, मोरङ, झापा हुदै पछिल्लो पटक उदयपुरमा पनि एक जनामा डेंगुको संक्रमण पाइएको प्रदेश स्वास्थ्य निर्देशनालयले जनाएको छ ।
डेंगुको संक्रमण फैलिदै जान थालेपछि अहिले डेंगु रोग फैलाउने एडिस जातको लामखुट्टे नियन्त्रण गर्न प्राविधिकहरु लागिपरेका छन् भने सर्वसाधारणमा सचेतना जगाउने कार्य पनि थालिएको छ । सफा जमेको पानीमा जीवन चक्र चलाउने सेतो टाटे लामखुट्टे नियन्त्रण गर्न घर भित्रका खाली डब्बा, गमला र अन्य सामानमा जमेको पानी फाल्न स्थानीयलाई सम्झाउने र सिकाउने कार्य जारी छ ।
यो जातको लामखुट्टेले दिउसो मात्र टोक्ने भएकाले सजग र सचेत हुन प्राविधिकहरुले आग्रह गरेका छन् । एकातिर सर्वसाधारणहरु डेंगु संक्रमणबाट आतंकित भईरहेका छन् भने अर्कोतिर निजी अस्पतालहरुले भने डेंगु परीक्षणका नाममा महंगो शुल्क असुल्न व्यस्त छन् ।
करिब ४ सय रुपैया पर्ने टेष्ट किटबाट परिक्षण गरिएको विराटनगरको नोबेल अस्पतालले २५ सय रुपैया सम्म लिने गरेको सेवाग्राहीहरुले गुनासो गरेका छन् । उनीहरुले महंगो शुल्क लिएकाले कारवाहीको दायरामा ल्याउन आग्रह समेत गरेका छन् ।
Copyright © 2019 / 2026 - Junkirikhabar.com All rights reserved
