केही दशकअघिसम्म प्रशस्त उद्योगधन्दा रहेका सुनसरी तथा मोरङमा पछिल्लो समय उद्योग बन्द हुनेक्रम जारी छ ।
सरकारले मुलुकमा राजनीतिक स्थायित्व भएकाले लगानी गर्ने वातावरण अनुकुल रहेको बताएपनि औद्योगिक वातावरण नभएको भन्दै व्यवसायीहरुले एक पछि अर्को गर्दै कलकारखाना बन्द गर्न थालेका छन् । २०४६ सालको राजनीतिक परिवर्तनपछि औद्योगिक क्षेत्रको विकासमा कालो बादल नै सुरु भएको थियोे ।
त्यसबेला सुनसरी–मोरङ औद्योगिक क्षेत्रमा ठूला निर्यातमुखी उद्योगको संख्या १ सय ५० वटा थियो । तर ३० वर्षपछि अहिले ठूला उद्योगको संख्या ४३ मा खुम्चिएको छ । तीमध्ये पनि अधिकांश उद्योग समस्याग्रस्त रुपमा सञ्चालन भइरहेका छन् ।
लामो समयको संक्रमणकाल अन्त्य भएर मुलुकमा नयाँ व्यवस्थासहितको स्थिर सरकार पनि गठन भइसकेको छ । तर उद्योगी व्यवसायी भने औद्योगिक क्षेत्रको विकासका लागि अनुकूल वातावरण नभएको गुनासो गरिरहेका छन् ।
उद्योग संगठन मोरङका अध्यक्ष भीम घिमिरे नयाँ लगानी थपिने भन्दा पनि भएका उद्योग पनि बन्द हुने क्रममा भएको बताउँछन् ।
उद्योग विभागकोे तथ्याङक अनुसार सुनसरी–मोरङ औद्योगिक करिडोरलगायत आसपासका क्षेत्रमा अहिले साना ठूला गरी ६६५ उद्योग सञ्चालनमा छन् । जसमध्ये १९ प्रतिशत उद्योगले मात्र उत्पादित वस्तु भारतसहित तेस्रो मुलुकमा निर्यात गर्ने गरेका छन् ।
राजनीतिक अस्थिरता बन्द–हड्ताल, श्रमिक आन्दोलन, विद्युत् अभाव, यातायात अवरोधलगायतका कारण उद्योग बन्द भएको उद्योगी सौरभ सारडाको भनाइ छ । औद्योगिक क्षेत्रमा नयाँ उद्योग स्थापनाका लागि बाह्य लगानीकर्ता नआएकाले पनि समस्या भइरहेको हो ।
सरकारको आर्थिक नीति उद्योगलाई दोहन गर्ने किसिमको देखिएकाले उद्योग क्षेत्रको विकास, विस्तार हुन नसकेको अर्का उद्योगी पवन सारडाको बुझाइ छ ।
उद्योग विभागका अनुसार सुनसरी–मोरङ औद्योगिक करिडोरमा ५ सय करोड रुपैयाँ उद्योगमा लगानी छ । यस औद्योगिक करिडोरमा जुट, चाउचाउ, बिस्कुट, तेल, मैदा, जुत्ता, चप्पल, धागो, साबुन, लगायतका वस्तु उत्पादन हुँदै आएका छन् । जहाँबाट झण्डै ५० हजार भन्दा बढी जनाले प्रत्यक्ष रोजगारी पाएका छन् ।
Copyright © 2019 / 2026 - Junkirikhabar.com All rights reserved
