इटहरी २ मा रहेको ‘माया घर नेपाल’ बेसहाराका लागि आश्रयस्थल बनेको छ । सडकमा अलपत्र परेका मानसिक रोगी महिलालाई पुन:स्थापित गर्ने उद्देश्यले माया घर स्थापना भएको हो ।
पछिल्लो समय आफन्त गुमाएका व्यक्तिलाई समेत संस्थाले आश्रय दिँदै आएको छ । दुई जना मानसिक महिला रोगीलाई कोठा भाडामा आश्रय दिएर संस्थाको थालनी गरिएको थियो । संस्थामा हाल ३२ जनाले आश्रय पाएका छन् । गत वर्ष सात दिने पुराण लगाउँदा स्थानीय तथा समाजिक संस्थाले माया घर नेपालका.लागि सात कठ्ठा जग्गा उपलब्ध गराएका थिए । संस्थाले थप तीन कठ्ठा जग्गा खरिद गरेर माया घर स्थापना गरिएको संस्थाकी सचिव सुभद्रा प्याकुरेलले बताइन् ।
आफन्त नभएका मानसिक रोगी महिलाको उपचार गर्ने संस्था नहुँदा अन्यत्र पठाउनुपर्ने अवस्था थियो । सोही समस्यालाई थोरै भए पनि समाधान गर्ने लक्ष्यका साथ पुराणवाचिका राधिका दासी तथा अगुवा महिलाको नेतृत्वमा संस्थाको सुरुवात भएको छ । संस्थाको पाँच कोठाको भवन छ । ज्येष्ठ नागरिक, सुत्केरी महिला, बालबालिकालाई भौतिक संरचना अभावको बाबजुद आश्रय दिइरहेका छन् । संस्थामा हाल भवनभन्दा बाहिर राखेर समेत आश्रय दिइरहेका छन् ।
पानी पर्दा र ठूलो हावाहुरी आउँदा संस्थाको कार्यालयमा आवासको व्यवस्था गरिँदै आएको छ । ‘ज्येष्ठ नागरिकदेखि सुत्केरी महिला माया घरमा हुनुन्छ,’ सचिव प्याकुरेलले भनिन्, ‘तर भवनको अभावमा व्यवस्थित तरिकाले राख्न सकिएको छैन ।’ मानसिक रोगीको उपचार खर्च, औषधि, दैनिक उपभोग्य वस्तुका लागि सहयोगी दाताहरू र समितिका पदाधिकारीको भरमा चलेको छ । स्थानीयबाट संस्था सञ्चालनका लागि सहयोगी हातहरू जुटेका छन् ।
कान्तिपुरबाट साभार
Copyright © 2019 / 2026 - Junkirikhabar.com All rights reserved
