डेंगुभन्दा घातक रोग स्क्रब टाइफस संक्रमितको संख्या बढेको छ । शुक्रराज अस्पतालमा मात्रै बैशाखदेखि साउनसम्म ४० जनालाई स्क्रब–टाइफस प्रमाणित भएको छ । त्यसमध्ये २३ जना संक्रमित अस्पताल नै भर्ना भएर उपचाररत् छन् । यो संक्रमणका कारण हालसम्म ४ जनाको मृत्यु समेत भएको छ ।
स्क्रब टाइफस संक्रमण माइट अर्थात किर्नाको टोकाइबाट लाग्ने रोग हो । किर्ना विभिन्न जनावरमा देखिने भए पनि मुसामा बढी पाइन्छ । यो परजीवीलाई रिकेटसिया सुसुगामुसी भनेर चिनिन्छ चिकित्सकका अनुसार नेपालमा मुसाबाट यो रोग सारेको पाइएको छ ।
झाडीमा बस्ने मुसाको कानमा पाइने ‘माइट’ झाडीमा सर्ने र सो झाडीमा मानिस जाँदा ‘माइट’ ले मानिसलाई टोकेपछि स्क्रब टाइफसको संक्रमण हुने गर्छ ।
सरकारी तथ्यांक अनुसार हाल स्क्रब टाइफस सबैभन्दा बढी प्रदेश नम्बर ५ मा देखिएको छ । त्यसपछि प्रदेश नम्बर ३ र सुदरपश्चिममा गरी ६१ जिल्लामा यो रोग देखिएको छ ।
उच्च ज्वरो आउनु, अत्यधिक टाउको दुख्नु, श्वास–प्रश्वासमा अबरोध महसुस हुनु, कान बन्द भए जस्तो हुनु, शरीरमा दाग घाउको कालो पाप्रो देखिनु वा खटिरा देखिनु स्क्रब टाइफस रोगको लक्षण हुन् ।
स्क्रब टाइफसले विशेष गरी श्वास–प्रश्वास नली मृगौंला, कलेजो, मस्तिष्कमा असर गर्छ । यो रोगबाट बच्न शरीर ढाकिने कपडा लगाउने बारी वा चौरमा बस्दा गुन्द्री ओछ्याएर बस्ने गर्नु पर्छ ।
सन् २००४ मा पाटन अस्पतालले गरेको एक अनुसधानमा स्क्रब टाइफस नेपालमा पनि फैलिएको पत्ता लागेको थियो । सन २०१५ मा धरानमा एकै पटक ८ जनाको मृत्यु भएपछि स्कब टाइफस संक्रमणले भएको पृष्टि भयो । सन् २०१५ यता बर्षेनी यो रोगको संक्रमित बढेका छन् ।
Copyright © 2019 / 2026 - Junkirikhabar.com All rights reserved
