क्षतिपूर्ति र मुआब्जा माग गर्दै सुनसरी, उदयपुर र सप्तरीका कोसी कटान डुबान पीडितले ४० औं दिनमा रिले अनशन स्थगित गर्ने निर्णय गरेका छन् । दसैं, तिहार र छठ पर्व नजिकिएकाले आन्दोलन स्थगित गर्नुपरेको कोसी कटान डुबान संघर्ष समितिका सचिव काशिम अन्सारीले बताए ।
पीडितहरूले कोसी नदी कटान डुबान पीडित सङ्घर्ष समिति गठन गरेर नेपाल र भारत सरकारको ध्यानाकर्षण गर्न ब्यारेजमा भदौ ३२ गतेदेखि रिले अनशन बसेका थिए । सचिव अन्सारीले भने, ‘नेपालीहरूले मनाउने दसैं, तिहार र छठ जस्ता चाडबाडलाई मध्यनजर गर्दै रिले अनशन स्थगित गरेका हौं ।’
अन्सारीले विराटनगरस्थित सम्पर्क तथा भूआर्जन कार्यालयका अधिकृत सन्तोष लिम्बूले कोसी पीडितको माग र रिले अनशनको जानकारी नेपाल सरकारलाई दिएको र भारतीय सरकारसँग कुरा गरेर समस्या समाधान गर्ने संकेत मिलेको आश्वासन दिएकाले पनि छठ पर्वसम्मलाई स्थगित गर्नुपरेको बताए । उनले भने, ‘छठ पर्व सकिए लगत्तै तीनवटै जिल्लाका कोसी पीडत एकीकृत भएर फेरि सशक्त आन्दोलन गर्ने निर्णय गर्ने छौं । रिले अनशन बिहीबार बिहान ८ बजे औपचारिक रूपमा स्थगित गरेका छौं ।’
०११ साल वैशाख १३ गते (सन् १९५४ अप्रिल २५) नेपाल र भारतबीच कोसी सम्झौता भएको थियो । सोही सम्झौताअनुसार कोसी भीमनगरमा ब्यारेज निर्माण भएको थियो । सचिव काशिम अन्सारीले भने, ‘ब्यारेज निर्माणपछि कटान र डुबान भएका पीडितलाई कोसी सम्झौतामा भएको प्रावधान अनुसार डुबान क्षेत्रमा रहेको जग्गाको क्षतिपूर्ति र मुआब्जा मात्र माग्दै रिले अनशन गरेका हौं ।’
Copyright © 2019 / 2026 - Junkirikhabar.com All rights reserved
