बीपी कोइराला स्वास्थ्य विज्ञान प्रतिष्ठानमा बिएस्सी नर्सिङ पहिलो वर्ष अध्ययनरत अञ्जना देवले आत्महत्या गर्नु केही मिनेटअघि एक युवकसँग मोबाइलमा कुरा गरेको ‘कल डिटेल’ मा पाइएको छ ।
अञ्जना भदौ ३१ गते बिहान प्रतिष्ठानकै छात्राबासमा झुन्डिएको अवस्थामा मृत फेला परेकी थिइन् । कल डिटेलमा ठेगाना नखुलेका सिद्धार्थ शर्मासँग पटक–पटक फोन सम्पर्क भएको देखिएपछि मृतकका बाबु रविन्द्रकुमार देव र काका शैलेन्द्रकुमार देवले आत्महत्या दुरुत्साहन कानुन अनुसार दोषी भए कारबाही गर्न माग गरेका छन् ।
इलाका प्रहरी कार्यालयमा उनीहरूले शर्माको फोटो बुझाएका छन् । छोरीसँग मोबाइलमा पटकपटक बोलेको र मृत्युभन्दा केही अघिमात्र पनि कुराकानी भएकाले वास्तविक र निष्पक्ष अनुसन्धान गर्न प्रहरीमा अनुरोध गरेको मृतकका बाबु रविन्द्रले बताए । ‘कल डिटेलको आधारमा शंकास्पद व्यक्तिलाई पक्राउ गर्न प्रहरीले आनाकानी गरिरहेको छ,’ उनले भने, ‘अञ्जनाले पंखामा सल बाँधेर आत्महत्या गरेको प्रहरीको भनाइ छ तर हामीलाई कुनै प्रमाण देखाएका छैनन् ।’
पीडित पक्षले घटनाको ७२ घण्टाभित्र पोस्टमार्टम रिपोर्ट सार्वजनिक नगरेपछि विराटनगरबाट प्रतिष्ठानमा आएर फोरेन्सिक विभाग प्रमुख डा. शिवेन्द्र झालाई रिपोर्ट दिन माग गरेका थिए । तर, झाले पोस्टमार्टम रिपोर्ट प्रहरीलाई मात्रै दिने बताएको रविन्द्रले बताए । उनले घटनाको आठ दिन वितिसक्दा पनि पोष्टमार्टम रिपोर्ट सार्वजनिक नभएको, शंकास्पद युवक पक्राउ नपरेको र अनुसन्धान फितलो भएको आरोप लगाए ।
Copyright © 2019 / 2026 - Junkirikhabar.com All rights reserved
