नेपालमा ७५ लाख जनता मुटुरोगी छन् । यो कूल जनसंख्याको २५ प्रतिशत हुन आउँछ । बदलिंदो जीवनशैली, अस्वस्थकर खानपिन नै मुटु रोगको कारण भएको चिकित्सकहरु बताउँछन् । विश्व मुटु महासंघले विश्वमा बर्षेनी १ करोड ७५ लाख मानिसहरु मुटु रोगका कारण ज्यान गुमाउने गरेको तथ्यांक सार्वजनिक गरेको छ ।
‘स्वस्थ्य मुटु सुरक्षित भविष्य’ नारा सहित देशभर आइतबार विश्व मुटु दिवस मनाइएको छ । काठमाडौंका विभिन्न अस्पताल, चिकित्सासँग सम्बन्धि क्षेत्रका अगुवाहरुले मुटु रोगबारे जनचेतना मुलक कार्यक्रम आयोजना गरे भने केही अस्पतालहरुले निशुल्क स्वास्थ्य शिविर पनि सञ्चालन गरे । अधिकांशलाई भने मुटु रोगबारे जानकारी नै छैन ।
मुटु दिवस कै अवसरमा इसिजी, इको, लिपिड प्रोफाइल, क्रेटिनाइन र ब्लड सुगर फास्टिङ परीक्षण निशुल्क गरिएको छ । अल्का अस्पतालले त शिविरमा स्वास्थ्य जाँच गर्न आउने मुटुका विरामीलाई दश दिनसम्म निशुल्क औषधि वितरण गर्ने घोषणा नै गरेको छ ।
छाती दुख्नु, मुटु ठुलो आवाजमा ढुकढुक हुनु, स्वाँ–स्वाँ हुनु, खुट्टा सुन्निनु, बेहोश हुनु र बढी थकाइ लाग्नु, मुटुरोगका प्रमुख लक्षणहरु हुन् । नेपाल हृदय रोग निवारण प्रतिष्ठानका अनुसार नेपालमा मुटु रोगीको सख्या १० वर्षयता पाँच गुणाले वृद्धि भएको छ । मानिसको जीवनशैलीमा आएको अस्वस्थकर परिवर्तन मुटुरोगको कारण हुन् ।
मुटु रोगबाट बच्न नुनको प्रयोग घटाउने, कम वोसोयुक्त खानेकुरा सेवन गर्ने, ताजा हरियो सब्जी र फल सेवन गर्ने गर्नुपर्छ, धुम्रपान सेवन गर्ने वानी सबैभन्दा घातक हुने चिकित्सकहरु बताउँछन् । राम्ररी सुत्न सकिएन भने यसले शरीरको स्ट्रेश हर्मोन बढाउँछ र धमनीलाई वाधा पु¥याउँछ । मुटुरोगको समयमै पहिचान नभएर लाखौ मानिस असामयिक मृत्युको शिकार हुनपुग्छन् ।
Copyright © 2019 / 2026 - Junkirikhabar.com All rights reserved
