नेपाल-भारत सीमासँग जोडिएका अधिकांश बजारमा नक्कली चुरोटको खुलेआम बिक्री वितरण हुने गरेको पाइएको छ । जनकपुर क्षेत्रमा नेपाली ब्राण्डका नक्कली चुरोट ‘खुकुरी’ र ‘शिखर’को बिगबिगी बढेको छ । धनुषा तथा महोत्तरीको सहरी तथा ग्रामीण क्षेत्रमा नेपाली ब्राण्डकै भारतीय नक्कली चुरोटको बिक्री वितरण भइरहेको भेटिएको हो ।
यो समस्या यी दुई जिल्लामा मात्र नभई प्रदेश दुईका आठ वटै जिल्लामा रहेको छ । जनकपुर भन्सार कार्यालयले धनुषाको गोदारस्थित सम्झना ट्रेडर्स र रुबी ट्रेडर्समा छापा मारेर १ लाख १४ हजार रुपैयाँ भन्दा बढी मूल्यको खुकुरी र शिखर ब्रान्डका नक्कली चुरोट बरामद गरेको छ ।
यसरी नक्कली चुरोट बिक्री गर्नेलाई अहिलेसम्म कुनै कारबाही भएको छैन । समान बरामद गर्नुले मात्रै नपुग्ने भन्दै कारवाही प्रक्रिया अगाडि नबढेसम्म यो समस्यामा कमी नआउने जानकारहरुले बताइरहेका छन् । सरकारले नियम बनाएपनि कार्यन्वयन हुन नसकेकै कारण नेपाली बजारमा नेपाली ब्राण्डकै भारतीय नक्कली सूर्तीजन्य पदार्थको बिक्री वितरण हुँदै आएको जिल्ला प्रहरी कार्यालय धनुषाले जनाएको छ ।
Copyright © 2019 / 2026 - Junkirikhabar.com All rights reserved
