औद्योगिक जिल्ला मोरङमा सबैभन्दा बढी राजस्व अन्तःशुल्कबाट उठ्ने गरेको छ । आव ०७५/७६ मा अन्तःशुल्कबाट ३ अर्ब ४२ करोड ६५ लाख ४१ हजार रुपैयाँ संकलन भएको छ । यो कुल उठेको ७ अर्ब १३ करोड ७८ लाख २४ हजार रुपैयाँ करको ४८ प्रतिशत भएको विराटनगरस्थित आन्तरिक राजस्व कार्यालयले जनाएको छ । यो गत आवको तुलनामा १ अर्ब ३७ करोड २० लाख ५८ हजार रुपैयाँ (६६ दशमलव ८२ प्रतिशत) ले बढि हो ।
आव २०७४/७५ मा कुल संकलित ५ अर्ब २१ करोड ४२ लाख ३ हजार रुपैयाँ राजस्वमा अन्तःशुल्क २ अर्ब ५ करोड ४४ लाख ८३ हजार रुपैयाँ (३९ दशमलव ४० प्रतिशत) उठेको उक्त कार्यालयले जनाएको छ ।
‘करको दायरा विस्तारले गर्दा अन्तःशुल्कमा वृद्धि भएको हो,’ उक्त कार्यालयका प्रमुख दिलीपकुमार गौतमले भने । मदिरा, वियर चुरोट, सिमेन्ट, रड, प्लास्टिक र नुडल्सलगायतमा यो कर लाग्छ । कार्यालयले आव २०७५/७६ मा आयकरबाट २ अर्ब २९ करोड ६८ लाख ३६ हजार रुपैयाँ (३२ दशमलव १८ प्रतिशत) र १ अर्ब ३७ करोड ७ लाख १२ हजार रुपैयाँ ( १९ दशमलव २० प्रतिशत) मूल्य अभिवृद्धि कर (भ्याट) बाट संकलन गरेको छ ।
आव २०७४/७५ मा आयकरबाट १ अर्ब ७८ करोड ९२ लाख ५९ हजार रुपैयाँ (३४ दशमलव ३१ प्रतिशत) र मूल्य अभिवृद्धि करबाट १ अर्ब २१ करोड ८८ लाख ३२ हजार रुपैयाँ (२३ दशमलव ३७ प्रतिशत) उठेको छ ।
आव २०७४/७५ को तुलनामा आव २०७५/७६ मा आयकर तथा भ्याट घटेको देखिन्छ । व्यवसायमा प्रगतिसँगै उद्योगीब्यापारी मझौला र ठूला कर दाता कार्यालयमा जाने हुनाले यो कार्यालयमा प्राविधिक रुपले भ्याट र आय कर घटेको देखिएको गौतमले बताए ।
आयकरमा व्यक्ति, संस्था, पारिश्रमिक, ब्याज कर एवं सामाजिक सुरक्षा करलगायत समावेश हुन्छ । औद्योगिक उत्पादन, ट्रेडिंग, बिक्री, वितरण र सेवाबाट मूल्य अभिवृद्ध कर (भ्याट) असुली हुन्छ । भाारतको ‘गुड्स एन्ड सर्भिसेज ट्याक्स (जीएसटी)’ र नेपालको भ्याट उस्तै भएको गौतमले बताए ।
Copyright © 2019 / 2026 - Junkirikhabar.com All rights reserved
