नेपाली कांग्रेसले धरानको मेयरमा तिलक राईलाई उठाउने भएको छ । यसअघि उम्मेवारी घोषणा गरेका सुजेन्द्र तामाङले तिलक राईलाई छाडिदिने घोषणा गरेपछि उनी उम्मेदवार बन्ने बाटो खुलेको हो ।
सुनसरी जिल्ला कमिटीका तर्फबाट तिलक राईलाई मेयरको उम्मेद्वार घोषणा गरिसके पनि पार्टी केन्द्रबाट यसले औपचारिकता पाइसकेको छैन । उपमहानगर, प्रदेशसभा र प्रतिनिधिसभाका उम्मेदवारहरुको टुंगो कांग्रेसको केन्द्रीय कार्यसमितिले लगाउने छ । यसका लागि आजै काठमाडौंमा केन्द्रीय पदाधिकारीहरुको बैठक बोलाइएको छ ।
आज बस्ने कांग्रेस पदाधिकारीको बैठकले कास्की-२ का लागि प्रतिनिधिसभाका उम्मेदवार तय गर्नेछ । त्यसैगरी भक्तपुर, बाग्लुङ र दाङका तीनवटै प्रदेशसभाका उम्मेदवार पनि आजै टुंगो लगाउने कांग्रेसको तयारी छ । धरान उपमहानगरपालिकाको उम्मेवारी टुंगो लगाउने जिम्मेवारी पनि पदाधिकारी बैठककै हो ।
प्रदेशभन्दा तीन गाउँपालिका अध्यक्ष, एक गाउँपालिका उपाध्यक्ष र ४३ वडाध्यक्षहरुको उम्मेवारी प्रदेश र जिल्ला कमिटीबाटै टुंगो लगाइने कांग्रेसले जनाएको छ ।
धरानको चुनावी अंकगणित
धरानमा ०७४ सालको चुनावमा एमालेका तारा सुब्बाले २० हजार ९७५ मत ल्याएर जितेका थिए । फोक्सोको निमोनियाका कारण ग्राण्डी अस्पतालमा सुब्बाको निधन भएपछि गत वर्षदेखि धरानमा मेयर पद खाली छ ।
तारा सुब्बासँग ०७४ को चुनावमा कांग्रेसका तर्फबाट तिलक राईले नै प्रतिस्पर्धा गरेका थिए । तिलकले १६ हजार १०२ मत प्राप्त गरेका थिए । यहाँ एमाले र कांग्रेसवीचको मतान्तर ४ हजार ८७३ थियो ।
एमालेसँग फराकिलो मतान्तरले हारेका उनै तिलक राई अहिले फेरि मेयरमा प्रतिस्पर्धा गर्दैछन् । राईलाई अर्को चुनौती के छ भने ०७४ सालमा उनले एमाले एक्लैसँग सामना गरेका थिए भने यसपालि माओवादी र एमाले मिलेको अवस्था छ ।
Copyright © 2019 / 2026 - Junkirikhabar.com All rights reserved
