सुनसरीको रामधुनी नगरपालिकास्थित प्रसिद्ध धार्मिक स्थल रामधुनी मन्दिर जाने सडकको कालोपत्रे दुई साता नपुग्दै उप्किएको छ। टेन्डर आफ्नो पक्षमा पार्ने होडबाजीमा निर्धारितभन्दा झन्डै आधा रकममा ठेक्का लिएको कम्पनीले कमसल काम गर्दा कालोपत्रे उप्किएको हो। सडकका थुप्रै स्थानमा कालोपत्रे उप्किन थालेपछि स्थानीयले ठेकेदार कम्पनीलाई गुणस्तरीय ढंगले काम गर्न दबाब दिन थालेका छन्।
रामधुनी प्रसिद्ध धार्मिक स्थल हो। त्यहाँबाट वराहक्षेत्रसँगै विजयपुर, बुढासुब्बा, पिण्डेश्वरी र चतराधामलाई एउटा विशेष सर्किट निर्माण गरेर विकासको परियोजना तयार गर्ने प्रदेश १ सरकारको योजना रहेको जनाइएको छ। वडा ३ स्थित मूलसडकबाट रामधुनी मन्दिर जाने ६ सय २३ मिटर सडक निर्माणका लागि रामधुनी नगरपालिकाले सडक बोर्ड नेपाल र नगरपालिकाको बजेटबाट २०७६ वैशाख ६ गते ठेकेदार कम्पनी जाल्पालाई काम गर्ने जिम्मेवारी दिएको थियो
सम्झौताअनुसार सडक बोर्ड नेपालको २९ लाख १९ हजार ६ सय ३३ रुपैयाँ र नगरपालिकाको १२ लाख ५१ हजार रुपैयाँको संयुक्त बजेट रहे पनि निर्माण कम्पनीले ठेक्का पार्न सस्तोमा टेन्डर हाल्यो। जसका कारण २३ लाख ८१ हजार सात सय ११ रुपैयाँमा ठेक्का सम्झौता हुन पुग्यो। ‘तोकिएको रकमभन्दा धेरै सस्तोमा टेन्डर हालेर काम पारेकै कारण गुणस्तरीय काम नभएको हो,’ स्थानीय जितेन्द्र सुवेदीले भने।
ठेकेदार कम्पनीलाई सडक निर्माण पूरा गर्न पहिलोपटक २०७६ असार मसान्तसम्म समय तोकिएको थियो। तर सो अवधिमा पूरा हुन नसकेपछि आगामी मंसिर मसान्तसम्मका लागि समय तोकिएको छ। पछिल्लोपटक थपिएको समयअगावै सडक निर्माण पूरा भइसके पनि नगरपालिकालाई जिम्मा लगाउन भने बाँकी छ।
Copyright © 2019 / 2026 - Junkirikhabar.com All rights reserved
