यस कारण शैलेश विष्ट अध्यक्षका दाबेदार हुन सक्छन् !

इटहरी । उद्योग वाणिज्य संघ इटहरीको चुनाव नजिकिँदै गर्दा उम्मेदवारहरु चुनावी प्रतिष्पर्धामा कम्मर कसेर लागिपरेका छन् । व्यवशायीको चुनाव भएपनि राजनीतिक रंगले रंगीएको चुनावलाई हेरेर इटहरीको आगामी नेतृत्व कुन पार्टीले सम्हाल्ने हो, त्यसको भविष्यवाणी गर्ने चुनावको रुपमा समेत यसलाई हेरिएको छ । हुन त उद्योगीहरुको चुनावले संसदीय दलको चुनावलाई निर्णायक अर्थ दिँदैन । तर पनि शहरी क्षेत्रका र व्यापारीहरुको रोजाइको दल र रोजाइको उम्मेदवारको परिचय भने पक्कै दिलाउँछ ।

यस पटकको चुनावमा नेकपाका युवा उम्मेदवार शैलेश विष्ट नेपाली काँग्रेस समर्थित भीम पौडेलका प्रतिष्पर्धी हुन् । 

विष्ट व्यवशायीक अनुभवमा त्यती पाका नहोलान् । तर उनको आँट र इटहरी बनाउँछु भन्ने दृढता भने परीपक्व छ । त्यसैले त इटहरीको विकासका साझा मुद्धाहरुमा उनी लागिरहेका छन् । कहिले राजधानीको बहसमा त कहिले व्यवशायिक अनुशासनमा अनि व्यवशायीका समस्याहरुमा पनि उनी अरुभन्दा चाँडो पुग्छन् र नेतृत्व लिन्छन् ।

हँसिला मिजासिला स्वभावका विष्ट उद्योग वाणिज्य संघमा तीन पटक सम्म सदस्यमा भीडेका उनले सर्वाधिक मत ल्याएर जित हात पारेका थिए । त्यसैले पनि यो पटकको चुनाव जित्न गाह्रो नहुने आँकलन एकथरीको छ ।

विष्ट इटहरीका रैथाने हुन् । उनको तीन पुस्ताले इटहरीमा बिताएको छ । तीन पुस्ताले समय बिताएको मात्रै छैन, इटहरीको लागि योगदानसमेत दिएको छ । उनका हजुरबुवादेखि बुवासम्म र उनकै पुस्ता पनि इटहरी विकासमा योगदान दिएको पुस्ता हो । त्यसैले इटहरीका पुराना वासिन्दाहरु र व्यापारीहरुको सपोर्ट पौडेललाई भन्दा विष्टलाई जाने सम्भावना छ । तर सबै इटहरीवासीले भोट भने नहाल्लान्, किनकी काँग्रेस तर्फबाट उम्मेदवार पौडेलका कारण काँग्रेस समर्थित व्यवशायीहरुको भोट पौडेललाई जानेछ । यद्यपी नेपाली काँग्रेसका व्यवशायीको भोट पनि आफूले तान्ने विष्ट दावी गर्छन् ।

विष्टको सबल पक्ष उनी पौडेलजतिको व्यस्त छैनन् । विष्टको देखिएको व्यवशाय ग्लास हाउस हो । त्यसबाहेक उनी विभिन्न सामाजिक कामहरुमा सक्रिय हुन्छन् । बारम्बार देश बाहिर घुम्न पनि गइरहन्छन् । त्यसैले उनले व्यवशायीलाई प्रशस्तै समय दिन सक्छन् । 

उता पौडेल आजका दिनसम्म पनि निकै व्यस्त छन् । छोरा विनोदले उनको केही व्यवशायीक जिम्मेवारी हेरिदिएका छन् । अरु नयाँ व्यवशाय पनि विनोदले सुरु गरेका छन् । तर पनि पौडेल आफै पनि उत्तिकै खट्छन् । प्रायः बिहान ३–४ बजेको समयमा आफ्नो ढुंगा गिटी बालुवाको कारोबारको लागि मोरंगका विभिन्न खोलामा पुगिसक्छन् ।

उनको यो सक्रियतालाई शुद्ध व्यवशायीक मान्नेले उनलाई समर्थन गर्छन् । तर यो सक्रियताले उत्पन्न गर्ने व्यस्तताका कारण पौडेलले समय दिन नभ्याउने पो हुन् कि भनेर संशय व्यक्त गर्नेहरुले विष्टलाई रोज्न सक्छन् । सामाजिक योगदानमा पौडेलले अहिलेसम्म आर्थिक योगदान बढी दिएका छन् । यता विष्टले भने पौडेलले जति आर्थिक योगदान दिएको देखिँदैन । तर समय भने प्रशस्त खर्च गरेका छन् ।

विष्टले इटहरीका धेरैजसो सरोकारका विषयमा बोलेका छन्, मोर्चा सम्हालेका छन् । जनआन्दोलनदेखि राजधानीका आन्दोलनमा इटहरीवासी सँगसँगै छन् । इटहरीमा बाढी आउँदा राहत तथा उद्धारमा विष्ट अलि बढी सक्रिय छन् । त्यसैले त्यो सक्रियताका कारण विष्ट धेरै मतदाताको रोजाईमा बन्न सक्छन् । विष्ट आफै पनि इटहरीका साना ठूला गरेर ८० प्रतिशत व्यवशायीहरुलाई आफूले चिन्ने दावी गर्छन् ।

अर्को कुरा विष्टले इटहरीको उद्योग वाणिज्य संघमा यो पटक कार्यबाहक प्रमुखको समेत जिम्मेवारी निभाए । यो उनको लागि निकै ठूलो अवसर थियो । अध्यक्ष लिलम बस्नेत सांसद भएर गएपछि उद्योग वाणिज्य संघको नेतृत्व उनैले लिए ।

नेतृत्वमा बसेपछि जस र अपजस आफैले लिनुपर्छ । तर अहिलेसम्म विष्टले त्यस्तो अपजस लाग्ने काम गरेका छैनन् । यसर्थ उनको कार्यवाहक अध्यक्षकाल सफल भएको मानिछ ।

उनले अध्यक्षता सम्हालेयता खासै काम नभएको र पुरानै कामको निरन्तरता भएको भन्दै आलोचना गर्नेहरुको संख्या पनि कम छैन । तर उनी भने आफूले इटहरीमा सोलार लाइट, सिसिटिभी जडान गरेको र उद्योग वाणिज्य संघ इटहरीको भवन निर्माण पुरा गरेको दावी गर्छन् ।

हुन पनि उनले अध्यक्षता सम्हाल्दै गर्दा संघको भवन अहिलेको स्वरुपमा आइपुगेको थिएन । अर्कोतर्फ संघका नियमित कामहरु र व्यवशायीका समस्या समाधानका नियमित चुनौतिहरु यथावत् नै थिए । यस्तोमा फरक तरिकाले काम गर्न सकेकोमा धेरैले उनको प्रसंसा गरेका छन् ।

जसले उनलाई यो चुनावमा विजयी बनाउन सक्छ ।