इटहरी । भारतको आन्द्र प्रदेसमा रहेको तिरुपति बालाजी मन्दिरकै स्वरुपमै निर्माण सम्पन्न गर्ने लक्ष्य सहित धार्मिक नगरी सुनसरीको बराहक्षेत्रमा तिरुपति बालाजी दिव्य धाम निर्माण कार्य सुरु भएको छ ।
बराहक्षेत्र नगरपालिका २ पुनर्वासमा रहेको बेंकटेश रामानुज सत्संग मन्दिर रहेको क्षेत्रमा पाँच वर्षमा निर्माण सम्पन्न गर्ने लक्ष्य सहित तिरुपति बालाजी दिव्य धाम निर्माण कार्य सुरु गरिएको हो ।
भारतमा रहेको तिरुपति बालाजी मन्दिरकै कला तथा शैलीमा मन्दिर निर्माण गरिने साथै नेपाली कलाले भरीपुर्ण आधुनिक सुविधायुक्त ४० कोठे आश्रम , विद्यालय , पार्कीगं, योगशाला, जडबुटी प्रशोधन गर्ने स्थल समेत दिव्य घाममा समेट्ने गरी काम भई रहेको तिरुपति बालाजी दिव्यधाम निर्माण समितिका अध्यक्ष स्वामी हरिप्रपन्नाचार्यले जानकारी दिए । २० करोडको लागत लाग्ने अनुमान सहित निर्माण कार्य सुरु भएको दिव्यधाम निर्माण सम्पन्न आगामी पाँच वर्ष भित्रमा सक्ने समेत लक्ष्य राखिएको उनले वताए ।
दिव्यधाम निर्माण कार्यमा सहयोग जुटाउन अस्ट्रेलिया ,अमेरिका ,क्यानडा ,बेलायतमा समेत उपसमिति बनाइए दाताहरुबाट सहयोग जुटाउने काम समेत भईरहेको जनाइएको छ । प्राचिन हरिद्धारका नामले परिचित सुनसरीको चतरा क्षेत्रमा निर्माण गरिने तिरुपति बालाजी दिव्यधाम निर्माण कार्य परियोजना तयार पारेर पहिलो चरणमा मन्दिर निर्माण कार्य सुरु गरिएको समितिका महासचिव चेतप्रसाद बरालले वताए । पवित्र दिव्यधाम निर्माण कार्यमा दाताहरुको सहयोगले गर्दा पाँच वर्ष अघिनै निर्माण सम्पन्न हुने महासचिव बरालले विश्वास लिएका छन ।
Copyright © 2019 / 2026 - Junkirikhabar.com All rights reserved
