प्रदेश १ को राजधानी विराटनगरमा सेडसहितको बस बिसौनी र ट्राफिक आइल्याण्ड निर्माण धमाधम भइरहेका छन् । पहिलो चरणमा पुष्पलाल चौक र कोशी राजमार्गअन्तर्गत भृकुटी चौकमा बस बिसौनी निर्माण भइरहेका छन् । दुवै स्थानमा निर्माण लगभग अन्तिम चरणमा पुगेको जनाइएको छ ।
विराटनगर महानगरपालिकासँग सम्झौता गरेर आकृति एड्भरटाइजिङ कम्पनीले काम गरिरहेको हो । विराटनगर भरी आकृतिले २७ वटा बस बिसौनी र २० वटा ट्राफिक आइल्याण्ड निर्माण गर्ने महानगरका प्रमुख प्रशासकीय अधिकृत एकदेव अधिकारीले बताए ।
सबै स्थानमा निर्माण सम्पन्न गर्दै ३७ वटा बस बिसौनी र आइल्याण्ड हस्तान्तरण गरेपछि कम्पनीले प्रत्येक स्थानबाट वार्षिक ३० हजार रुपैयाँ राजस्व महानगरलाई बुझाउनुपर्ने उनको भनाइ छ ।
सबै सञ्चालनमा आइसकेपछि विराटनगर महानगरलाई बस बिसौनी र ट्राफिक आइल्याण्डबाट वार्षिक ११ लाख १० हजार रुपैयाँ आम्दानी हुनेछ । 'महानगरले कम्पनीलाई ठाउँ उपलब्ध गराएको हो, 'अधिकारीले भने, 'कम्पनीले त्यसवापत राजस्व तिर्नुपर्ने भएकाले महानगरलाई आम्दानी हुने छ ।'
बस बिसौनीमा यात्रुबहाक बस रोक्ने, यात्रु चढाउने र ओरार्ने काम हुने छ । त्यसलाई यात्रुले प्रतीक्षालय र रिफ्रेसमेन्ट सेन्टरका रुपमा पनि उपयोग गर्न सक्नेछन् । त्यहाँ विद्युत, मोबाइल चार्जिङ र बस्न सक्ने सुविधा उपलब्ध हुने छ । महानगरपालिकामा बढ्दो ट्राफिक जामको समस्या समाधान गर्न महेन्द्र चौकदेखि भृकुटी चौकसम्म चार स्थानमा तत्काल आइल्याण्ड बनाइनुपर्ने अवस्था रहेको महानगरले जनाएको छ ।
Copyright © 2019 / 2026 - Junkirikhabar.com All rights reserved
