धरानमा शनिबार सम्पन्न भएको उपनिर्वाचनमा ५५ हजार बढी मत खसेको छ ।
मुख्य निर्वाचन अधिकृतको कार्यालयका अनुसार कुल ५५ हजार ११ मत खसेको हो । मुख्य निर्वाचन अधिकृत राधाकृष्ण उप्रेतीका अनुसार धरानमा पुरुष भन्दा बढी महिला मतदाताले भोट हालेका छन् । उनका अनुसार २९ हजार ८ सय ५४ जना महिलाले मतदान गरेका छन् भने २५ हजार १ सय ५७ पुरुषले मतदान गरेका छन् । यो मत प्रतिशत ५९.२४५ प्रतिशत भएको मुख्य निर्वाचन अधिकृत उप्रेतीले जानकारी दिए । धरानको कुल मतदाता संख्या ९२ हजार ८ सय ५३ हो ।
राती १० बजेदेखि नै धरानको मतगणना शुरु हुने भएको छ । मुख्य निर्वाचन अधिकृत उप्रेतीका अनुसार राजनीतिक दल तथा उम्मेदवारको प्रतिनिधिहरुसँगको बैठकमा राती १० बजेदेखि मतगणना शुरु गर्ने सहमति भएको हो ।
मतगणना वडागतरुपमा शुरुवात हुनेछ । पहिला २० नम्बर वडाबाट मतगणना शुरुवात हुनेछ भने वडा नं ७ को मतगणना अन्तिममा हुनेछ । वडा नं ७ मा अध्यक्ष पदको पनि मतदान भएको हो ।
यसअघिको स्थानीय तहको निर्वाचनमा पनि नेकपा र काङ्ग्रेसबीच नै भिडन्त भएको थियो । निर्वाचन अधिकृतको कार्यालयका सहायक निर्वाचन अधिकृत अजय मिश्रका अनुसार ८ बजे सर्वपक्षीय छलफलपछि मत गणनाको विषयमा टुंगो लाग्ने छ । रातको ११ बजेबाट मतगणना शुरु हुने अनुमान गरिएको छ । सुब्बाको २०७५ साउन १ गते निधन भएपछि मेयर पद रिक्त रहेको थियो भने ७ नम्बर वडाका वडाध्यक्ष भुवन मोक्तानको निधन भएपछि उक्त पद पनि खाली रहेको थियो ।
मेयर र वडा अध्यक्ष पदको लागि आज भएको उपनिर्वाचन धरानमा शान्तिपुर्णरुपमा सम्पन्न भएको छ ।
Copyright © 2019 / 2026 - Junkirikhabar.com All rights reserved
