मंसिर १९, २०७६
जुनकिरी खबर

घूस रकमसहित असई पक्राउ

तरकारी व्यापारीसँग घूस लिँदै गर्दा विराटनगरमा बुधबार प्रहरीका एक असई पक्राउ परेका छन् । अख्तियार दुरुपयोग अनुसन्धान आयोग इकाई इटहरीले जिल्ला प्रहरी कार्यालय मोरङमा कार्यरत श्यामकुमार दाहाललाई घाँसचोकमा एक तरकारी व्यापारीसँग सात हजार रुपैयाँ लिँदै गर्दा नियन्त्रणमा लिएको हो ।

जिल्ला प्रहरीले विराटनगरको सीआरभी पोस्ट केसलियामार्गमा उनको नेतृत्वमा ११ जना प्रहरीलाई खटाएको थियो । अख्तियार इटहरीका डीएसपी श्यामकुमार मगरको नेतृत्वमा आएका टोलीलाई असई दाहाललाई पक्राउ गरेको हो ।

अख्तियार इटहरीका प्रवक्ता ज्ञानेन्द्र ढकालले सुनसरीबाट विराटनगर ल्याउने भारतीय तरकारी जाँच नगर्ने सर्तमा तरकारी व्यापारीसँग अवैध रकम असुल्ने क्रममा पक्राउ गरिएको बताए । दाहालले घूस रकम मागेपछि व्यापारीले अख्तियारमा उजुरी गरेका थिए । दाहाल दुई महिनाअघि इलामबाट जिल्ला प्रहरी मोरङमा आएका थिए ।