पूर्वको प्रसिद्ध धार्मिक स्थल ताप्लेजुङको पाथीभरा र खोटाङको हलेसी थानमा दर्शन गर्नकालागि हेलिकप्टर सञ्चालन हुने भएको छ ।
धरान होलिडेज र माउण्टेन हेलिकप्टर्स प्रालिले धरानदेखि पाथीभरा दर्शन, हलेसी दर्शन, धरानको साइड सिन, माउण्टेन फ्लाइट र हेलिकप्टर चार्टरको प्याकेज सार्वजनिक गरेको छ । बिहीबार धरानको होटल पूर्वी स्टारमा पत्रकार सम्मेलन गर्दै धरानदेखि पाथीभरा दर्शन र हलेसी दर्शनकोलागी ३४ हजार, धरानको साइड सिनकालागी ५ हजार लगायतको प्याकेज सार्वजनिक गरेको छ ।
पाथीभरा र हलेसी दर्शनकालागि धरान, विराटनगर लगायत भारतको दार्जिलिङ, सिक्किम तथा भुटानदेखिका भक्तजनको अत्याधिक भिड लाग्ने गरेको भन्दै त्यसको सहजताकालागि आफुहरुले हेलिकप्टरको व्यवस्था गरेको माउण्टेन हेलिकप्टरका महाप्रबन्धक दिलबहादुर ओलीले बताए । उनका अनुसार पाथीभरा तथा हलेसी दर्शन गरेर २ घण्टामा धरान फर्किइसकिने छ । ओलीले भने ‘धरानका स्थानीय पर्यटन व्यवसायीहरुसँग सहकार्य गरेर प्याकेज ल्याएका छौं, यसले धरानको पर्यटनलाई समेत चलायमान बनाउनेछ ।’ अहिले धरान रंगशालाको तल्लो भागबाट उडान भर्ने व्यवस्था मिलाइएको उनले बताए । होलिडेज धरानका सञ्चालकहरु कुन्दन श्रेष्ठ, अमृत मानन्धर, त्रिरत्न अधिकारी र अजय खनालको प्रयासमा धरानबाट हेलिटुरको व्यवस्था मिलाइएको हो ।
Copyright © 2019 / 2026 - Junkirikhabar.com All rights reserved
