असार १८, २०७६
जुनकिरी खबर

किर्ते कागजात बनाउने ३ पक्राउ

काठमाडौँ — कृषि विकास बैंकका कर्मचारीको मिलेमतोमा बैंक जमानतको नक्कली कागजपत्र तयार पारी रकम निकालेर ठेक्का पारेको आरोपमा तीन जना पक्राउ परेका छन् ।

नेपाल प्रहरीको केन्द्रीय अनुसन्धान ब्युरोले बैंकको रत्नपार्क शाखाका अधिकृत छविलाल ढकाल तथा एमएस एमके र वाइपी जेभी कन्स्ट्रक्सन कम्पनीका प्रतिनिधि रणधीर तुब्बा र देवजंग शाहीलाई पक्राउ गरेको हो।

उनीहरूले बैंकको छाप, दस्तखत र लेटर प्याड किर्ते गरी १ करोड १० लाख ११ हजार रुपैयाँको अग्रिम भुक्तानी जमानतको कागजात बनाएर भोजपुर–टक्सार–कोट–गोगने–लेखर्क सडक स्तरोन्नतिको १२ करोड ५५ लाख ९७ हजारको ठेक्का हात पारेका थिए।