जिल्लाका १० नगर र गाउँपालिकामध्ये दुई वटामा अझै पनि बिजुली पुगेको छैन । दुर्गम मानिएको भोटखोला र सिलिचोङ गाउँपालिका विद्युत्को केन्द्रीय प्रसारण लाइनमा जोडिन नसक्दा स्थानीयहरू अँध्यारोमा बस्न बाध्य छन् ।
कतिपय गाउँमा स्थानीय खोलाबाट उत्पादन गरिएको पेल्ट्रिक सेट, माइक्रोहाइड्रो र हाइड्रोपावरको भरमा उज्यालो पुगेको छ ।
मकालुका काजीमान गुरुङले स्थानीय खोलाबाट उत्पादन गरिएको जलविद्युत् योजनाहरू छिटोछिटो बिग्रिँदा समस्या आइरहने बताए । ग्रामीण क्षेत्रका अधिकांशले दीर्घकालीन रुपमा बिजुलीको व्यवस्था गरिदिन माग गरेका छन् । ‘आर्थिकरुपले सम्पन्न र पहुँचवालाले सोलार बत्ती बाल्छन्,’ भोटखोलाका नुर्बु भोटेले भने, ‘हामीले कहाँ पाउनु ? आगो र टुकीको भरमा जीवन बितेको छ ।’
भोटखोला सीमावर्ती नाका छिमेकी देश चीनसँग सिमाना जोडिएको गाउँपालिका हो । सदरमुकाम खाँदबारीबाट भोटखोला गाउँपालिकाको केन्द्र हटिया पुग्न मात्रै १ सय २ किमी कच्ची सडक हिँडेरै पार गर्नु पर्छ । हिँउदमा भने साना सवारीसाधन चल्छ । किमाथांका नाका पुग्न १ सय ६२ किमि पार गर्नुपर्छ ।
Copyright © 2019 / 2026 - Junkirikhabar.com All rights reserved
