बलात्कार आरोपमा गत मंसिर १ ६गते पक्राउ परेका सिद्धबाबा भनिने कृष्णदास गिरीलाई धरौटीमा रिहा गर्न अदालतले आदेश दिएपछि महिला अधिकारकर्मी असन्तुष्ट बनेका छन्।
सुनसरी जिल्ला अदालतका न्यायाधीश राधाकृष्ण उप्रेतीको इजलासले उनलाई तीन लाख रुपैयाँ धरौटीमा रिहा गर्न आदेश दिएको छ। अदालतको यस्तो आदेशले बलात्कार आरोपित सिद्धबाबालाई हौसला मिल्ने अधिकारकर्मीको भनाइ छ।
इटहरीको महिला आधारशिलाकी अभियानकर्मी सुशीला उप्रेतीले बलात्कार आरोपितलाई थुनामा लिएर अनुसन्धान हुनुपर्नेमा धरौटीमा छाड्दा अनुसन्धान प्रभावित हुन सक्ने बताइन्।
सिद्धबाबाविरुद्ध आन्दोलनको अगुवाइ गर्दै आएकी उप्रेतीले फैसलाले निराश बनाएको प्रतिक्रिया दिइन्।
‘हामी सम्मानित अदालतलाई सम्मान गर्छौं’, उनी भन्छिन्, ‘तर, सभामुखलाई समेत बलात्कार आरोपमा अनुसन्धान हुँदै गर्दा सिद्धबाबालाई चैँ किन छाडियो ?’
एक २९ वर्षीया अनुुयायी महिलालाई करणी गरेको आरोपमा सिद्धबाबालाई मंसिर १६ गते पक्राउ गरी अदालतमा उपस्थित गराएको थियो।
आइतबारदेखि दुई दिनसम्म चलेको थुनछेक बहसपछि जिल्ला अदालत सुनसरीले उनलाई तीन लाख धरौटीमा रिहा गर्ने आदेश दिएको हो।
कृष्णदासलाई कडा कारबाही हुनुपर्ने माग गर्दै आएका महिलाले भने उच्च अदालत जाने चेतावनी दिएका छन्। अदालतको फैसला चित्त नबुुझेको भन्दै प्रदर्शनमा रहेका महिलाले असन्तुुष्टि जनाउँदै अदालत परिसरमा प्रदर्शन गरेका थिए।
गत शुक्रबारदेखि सिद्धबाबाको पक्ष र विपक्षीमा प्रदर्शन भएपछि ठूलो संख्यामा सुरक्षाकर्मीपरिचालन गरिएको थियो। सोमबार पनि बिहानैदेखि दुुवै पक्षले प्रदर्शन गरेका थिए ।
नेपाल समयबाट साभार
Copyright © 2019 / 2026 - Junkirikhabar.com All rights reserved
