बलात्कार आरोप अनुसन्धानका क्रममा अस्पताल बसेका सिद्धबाबा कृष्णदासजी महाराज भनिने कृष्णबहादुर गिरीले ३८ दिनपछि आश्रम फर्किएका छन्।
अस्पतालले डिस्चार्ज दिएसँगै उनी आइतबार चतरा फर्किएका हुन्। बलात्कार आरोपमा जिल्ला अदालत सुनसरीले गत सोमबार तीन लाख रुपैयाँ धरौटीमा छाड्न आदेश दिए लगत्तै उनी उपचारका लागि विराट नर्सिङ होममा भर्ना भएका थिए।
बलात्कार आरोप लागेपछि मंसिर १२ गतेबाट उनको अस्पताल बसाई सुरु भएको थियो। धरौटीमा छाड्ने अदालतबाट आदेश आएको एक सातापछि उनलाई अस्पतालले डिस्चार्ज दिएको हो।
उनलाई अस्पतालका वरिष्ठ मुटु रोग विशेषज्ञ डा. ज्ञानेन्द्र गिरीले ‘माइनर हटअट्याक’ भएको बताउँदै उपचार सुरु गरेका थिए। गिरीले कृष्णबहादुर खतरामुक्त नरहेका कारण लामो समय चिकित्सकको निगरानीमा अस्पतालमै राखेर उपचार गर्नु परेको दाबी गरेका छन्। उनले अदालतमा पनि यही कुरा लेखेर पठाइदिएको बताए। उपचार प्रक्रिया पूरा भएर स्वास्थ्य अवस्था सामान्य बनेपछि उनलाई आइतबार भने डिस्चार्ज गरिएको अस्पतालले जनाएको छ।
Copyright © 2019 / 2026 - Junkirikhabar.com All rights reserved
