मोरङको केराबारी गाउँपालिका–१० वर्षा चोकमा भेटिएको सुतली बम नेपाली सेनाको डिस्पोजल टोलीले शनिबार बिहान डिस्पोज गरेको छ । गाउँपालिका कार्यालयबाट ५० मिटर जति उत्तरमा सडकमा बम भेटिएपछि स्थानीय बासिन्दा आतंकित बनेका थिए ।
बम फेला परेपछि त्यस ठाउँलाई नियन्त्रणमा लिएर समयमै डिस्पोज गर्न सकेका कारण विष्फोट भएर कुनै मानविय क्षति हुन नपाएको प्रहरीले जनाएको छ ।
अज्ञात समूहले वडा नम्बर १० मा रहेको गाउँपालिका कार्यालयको मुख्य गेटमै शुक्रबारराति १० बजे प्रेसर कुकर बमसमेत विष्फोट गराएको गाउँपालिका प्रमुख रोहित कार्कीले बताए । विष्फोटपछि स्थानीयबीच भागदौड मच्चिएको थियो । कार्कीले विष्फोटका कारण जनजीवन आतंकित बनेको जानकारी दिए । भौतिक क्षति भएपनि घटनामा कुनै मानविय क्षति भने नभएको उनको भनाइ छ ।
विष्फोट कसले र किन गराएको हो भन्ने यकिन हुन सकेको छैन । तत्काल विप्लव वा अन्य कुनै समूहले विष्फोट गराएको आधार तथा संकेत भने फेला नपरेको र घटनाको अनुसन्धान भइरहेको मोरङ प्रहरीका प्रवक्ता डीएसपी लोकदर्शन थापाले जानकारी दिए। उनले विष्फोट गराउनेको खोजीका लागि प्रहरीको विशेष टोली परिचालन गरिएको जानकारी दिए ।
Copyright © 2019 / 2026 - Junkirikhabar.com All rights reserved
